Dızaınerlerdiń alǵashqy respýblıkalyq «ALTYN OIMAQ» baıqaýy ótedi
PETROPAVL. QazAqparat - Soltústikqazaqstandyq dızaınerler «ALTYN OIMAQ» respýblıkalyq baıqaýyna qatysýǵa ázir. Jergilikti dızaınerlermen, tiginshilermen, atele jetekshilerimen jáne bolashaq mamandarmen kezdesý ótip, baıqaýdyń sharttary túsindirildi, dep habarlaıdy QazAqparat tilshisi.
Shyǵarmashylyq jarysty "Atameken" Ulttyq kásipkerler palatasy áıelder kásipkerligin qoldaý qorymen birlese alǵash uıymdastyryp otyr.
Ulttyq kásipkerler palatasy baspasóz qyzmetiniń habarlaýynsha, baıqaýdyń talaptaryn túsindirý maqsatynda Petropavlǵa jobanyń jetekshisi Dıana Botaeva arnaıy keldi.
"Baıqaýdy ótkizýdegi maqsat - ulttyq naqyshta kıim-keshek, buıymdar tigetin jańa ıdeıasy bar dızaınerler tabý. Kıim kúndelikti kııýge arnalýy tıis. Sondaı-aq kezdesý barysynda kásipkerlerge ári qaraı damýǵa qandaı kedergi bar ekenin bilýge tyrysamyz", - deıdi Dıana Botaeva.
Baıqaý alty nomınatsııa boıynsha ótedi. Qatysýshy birden eki nomınatsııaǵa óz jumysyn usyna alady. SQO-da shyǵarmashylyq jarysqa qatysýǵa tilek bildirgender az emes. Solardyń biri - Zarına Chernıaeva. 11 jyldyq tájirıbesi bar dızaınerdiń Petropavlda ǵana emes, Nur-Sultan men Almatyda da tutynýshylary bar eken.
"Byltyr men Máskeýde ótken dızaınerler baıqaýyna qatystym. Ol jerde aty shyqqan, tanymal qatysýshylar kóp boldy. Jeńimpazdy onlaın daýys berý arqyly tańdady. 54 qatysýshynyń ishinen men 4-oryn aldym. Endi mundaı baıqaýdyń bizde de ótetinine qýanyshtymyn. Biz - áıelder kıimin tigemiz. Baıqaýǵa usynatyn eskızderimiz ázir", - deıdi Zarına Chernıaeva.
«ALTYN OIMAQ» baıqaýynda tiginshilerge jasy boıynsha, tájirıbesi boıynsha shekteý joq. 16 jastan asqan sheberler de qatysa alady. Baıqaýǵa kostıýmderdiń eskızin berse, jetkilikti.
Ár nomınatsııadan jeńimpaz anyqtalyp, árqaısysyna mıllıon teńgeden beriledi. Uıymdastyrýshylardyń aıtýynsha, baıqaýdyń bereri kóp. Olar kópshilikke ózderin tanytyp qana qoımaı, keıin túrli semınarlarǵa tegin joldama alyp, bilimderin jetildire alady. Joba aıasynda tamyz aıynda jeńil ónerkásipke arnalǵan forým ótedi. Baıqaýǵa qatysýshylar 2 kún boıy semınarlarǵa, kýrstarǵa jáne sheberli saǵattaryna qatysýǵa múmkindik alady. Budan basqa forýmda jeńil ónerkásipke qatysty mańyzdy máseleler kóterilmek.
