Dızaıner Sáken Jaqsybaev Astanada óziniń jańa toptamasyn tanystyrdy (FOTO, VIDEO)
ASTANA. QazAqparat - Astanada Rixos qonaqúıinde qazaqstandyq fashion-prodıýser ári dızaıner Sáken Jaqsybaev óziniń jańa toptamasyn jurt nazaryna usyndy, dep habarlaıdy tilshimiz Arman Ospanov.
ZhSaken brendiniń negizin qalaýshy Jaqsybekov 2014 jylǵy jazdy pozıtıvti, jarqyn tústermen qarsy alýdy usynady. Otandyq dızaınerge shabyt bergen kógaldy saıabaq bolypty. Saıabaqta qydyrǵan adamnyń kóńili sergek, jaıdary bolady, sondyqtan ol kıimderiniń túsin de, pishinin de sol emotsııalarǵa saı tańdapty. «Bul toptama - kýtıýr da emes, pred-a-porte de emes. ZhSaken brendin kez kelgen adam satyp ala alady. Bizdiń kıimderimiz jas ári stıldi qyzdarǵa unaıdy dep oılaımyn. Búgin biz alǵash ret erlerge arnalǵan kıimder toptamasyn kórsettik. Bul kıimderge de suranys joǵary. Biz tek sapaly, qymbat matalardy paıdalanamyz. Sondyqtan sapaly kıimdi tanı biletin adam onyń tıisti baǵasyn beredi dep oılaımyn. Men búgin bizdiń kıimderimiz naryqtaǵy álemdik brendtermen básekelese alady dep nyq senimmen aıta alamyn», - dedi S. Jaqsybaev. Dızaınerdiń sózine qaraǵanda, ZhSaken brendiniń kıimderin Almaty men Astanada satyp alýǵa bolady. Taıaýda elimizdiń batys óńirlerinde dúkender ashý josparlanǵan. Іs-sharaǵa sándi baǵalaı biletin adamdarmen qosa dıplomatııalyq salanyń ókilderi jáne tanymal ártister men telejúrgizýshiler qatysty. Olardyń ishinde, Dınara Sátjan, Láılá Sultanqyzy, Dılnaz Ahmadıeva jáne Son Paskal bar. Atap óteıik, bul sán kórsetilimi bir apta buryn Almatyda ótken bolatyn.
