Dızaıner myń jylǵa tótep beretin týflı jasady
ASTANA. QazAqparat - Brıtandyq dızaıner Krıs Shellıs álemdegi eń tózimdi bıik óksheli týflı jasady, dep habarlady Lenta.rý.
Dızaınerdiń aıtýynsha, ol myń jylǵa tótep beredi. Jańashyl aıaq kıimge tot baspaıtyn bolat pen kúmis paıdalanǵan. Shellıs onyń uzaqqa shydaýmen jáne beriktigimen qatar taǵy bir mańyzdy sapalyq qasıeti bar ekenin aıtady: bul týflı kııýge de qolaıly kórinedi. Mundaı aıaq kıimdi 1600 dollarǵa satyp alýǵa bolady, dep jazady The Daily Mail.
Ony jóndeýdiń qajeti joq jáne tozbaıdy. Riviera degen ataýǵa ıe bolǵan týflı joǵary ortopedııalyq standartpen jasalǵan, ókshesi bıik bolsa da, kúni boıy 10 saǵattan astam ýaqyt kıip júrseń de aıaqty taldyrmaıdy.
Muny jasaýǵa Krıs Shellıs eki jyl ýaqytyn sarp etken. Ol bıik óksheli qolaısyz týflı kıip júrgen áıelderdi aıaıtynyn aıtady, onyń ústine ókshesi túsip qalyp ábigerge salatynyn qaıtersiń. Dızaıner óz eńbeginiń nátıjesine razy jáne onyń jasaǵan modeli áıelder úshin sándik ınvestıtsııa bola alady. «Ony nemerelerine muraǵa qaldyrýǵa bolady», - deıdi ol.
Budan buryn Shellıs 2011 jyly quny 336 myń dollar turatyn baǵaly metaldar men tastardan jeńil aıaq kıim jasap shyǵarǵan bolatyn.
