Dızaıner Aıda Kaýmenova: Týǵan jerimniń tabıǵaty shabyttandyrady
Aıtýly sharaǵa týǵan jerinen nár alyp, ár salada eńbektenip júrgen bir top azamat arnaıy keldi. Olar aýdannyń áleýmettik-ekonomıkalyq damýyna, mádenıeti men rýhanııatyna óz úlesin qosýǵa daıyn ekendikterin jetkizdi.
Solardyń biri - belgili dızaıner Aıda Kaýmenova. Modeler sán álemindegi árbir jetistigine týǵan jeri shabyt beretinin jasyrmady. Onyń aıtýynsha, jer jánnaty - Jetisýda týyp-ósken árbir azamat daryndy. Al týǵan jeri oǵan kúsh-qýat beredi. Sondyqtan isker áıel kindik qany tamǵan aýylyna jıi kelip, rýhanı qaırattanyp qaıtýdy dástúrge aınaldyrǵan.
Aıta ketý kerek, búginde Aıda Kaýmenovanyń erekshe dızaındegi kıimderi joǵary suranysqa ıe.
Jalpy jerlester bul jıynǵa «Elime, jerime ne beremin? Qandaı kómegim tıedi?» degen nıetpen keldi. Solardyń biri - Almaty oblystyq Іshki ister departamentiniń basshysy, general-maıor Murat Urymhanov. Ol Sarqan aýdanynyń Shatyrbaı aýylynda dúnıege kelgen polıtsııa basshysy, óziniń ustazy, birneshe býyn tártip saqshysyn tárbıelegen soǵys ardageri, general Ábdiqadyr Bolsambekovtiń músinin ujymmen birge jumyla ornatýǵa ýáde berdi.
Ózge de sarqandyqtar eli men jeri úshin aıanbaı eńbek etken daryndy tulǵalar Erkeǵalı Rahmadıev pen Muhtar Arynǵa da eskertkishterdi óz kúshterimen ornatýǵa sóz berdi. Osylaısha, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyrylǵan forýmda jerlester 3 eskertkish ornatýǵa nıet bildirdi.
Aıta ketý kerek, Sarqan óńiri Muhamedjan Tynyshbaev, Muqan Tólebaev, Muhtar Aryn syndy ult zııalylaryn dúnıege ákelgen kıeli topyraq.
