Dızaın-kod elordanyń kelbetin qalaı ózgertedi
NUR-SULTAN. QazAqparat - Elordanyń sáýlettik-estetıkalyq kelbeti qalanyń dızaın-kodynda jazylǵan. Bul týraly búgin Ortalyq kommýnıkatsııalar qyzmetindegi baspasóz máslıhatynda elorda ákimi Altaı Kólginov aıtty, dep habarlaıdy QazAqparat tilshisi.
Onyń aıtýynsha, dızaın-kod - stılıstıkalyq birtutas, jaıly jáne qaýipsiz qalalyq ortany qalyptastyrý úshin birqatar ereje men usynystan quralǵan.
«Dızaın-kod ǵımarattyń jáne kóshe-jol keńistiginiń qasbettik elementterine baǵyttalǵan. Ǵımarattyń qasbeti jaǵynan jol jelisiniń qoldanystaǵy jaǵdaıyn kishigirim sáýlettik nysandardy, kógaldandyrýdy, árleý materıaldaryn paıdalanýdy, tús shemalaryn jáne jarnamalyq qurylymdardyń ólshemderin eskere otyryp túzetý josparlanǵan. Sonymen qatar, dızaın-kod erejesi qala keńistigin damytýdy retteıdi. Dızaın-kodtyń basty mindeti - qoǵamdyq keńistikti damytý jáne adamdar úshin yńǵaıly qala qurý», - dedi A.Kólginov.
Sondaı-aq kóshe keńistigin 4 synypqa jiktelgen. Olar: úzdiksiz qozǵalystyń qalalyq mańyzy bar negizgi kóshe, retteletin qozǵalys, aýdandyq mańyzy bar negizgi jáne jergilikti kóshe. Jol qozǵalysy men jaıaý júrginshilerdiń qozǵalysy naqty bólinbegenine baılanysty trotýarlarǵa kóp júkteme túsedi. Dızaın-kodta jaıaý júrginshiler, velosıped alańdary, kóshe kafeleri, qoǵamdyq oryndar men kógaldandyrýdy naqty bólý qarastyrylǵan.
Ár aımaqtyń ózindik abattandyrý elementteri bar: abattandyrý, trotýar jáne alań jamylǵylary, jaryqtandyrý, kóshe jıhazdary, aıaldama pavılondary jáne basqalary.
Jarnamalyq nysandar men qondyrǵylardy, sondaı-aq ǵımarattardyń qasbetterine kondıtsıonerlerdi ornalastyrý erejeleri ázirlendi. Dızaın-kod qalanyń kelbetin jaqsartyp, týrıstik tartymdylyqty arttyrady.
Eske sala ketsek, 12 jeltoqsanda elordanyń qalalyq máslıhaty bas qalanyń dızaın-kod jobasyn bekitken edi.
