Dızaın-kod: Astanalyq kásipkerler bıznes mańdaıshasynyń alynyp tastalýyna narazy
«Qazir buǵan shaǵymdanǵan birneshe kásipkerler bar. «Astana jarnama» KMM aqparaty boıynsha 3 myńnan astam mańdaısha alynyp tastaldy. Shaǵymdar búgingi kúnge deıin kelip jatyr», - dedi Astana qalasy Kásipkerler palatasynyń «Atameken» kásipkerler quqyqtaryn qorǵaý jáne ákimshilik kedergilerdi azaıtý bóliminiń basshysy Almas Bashıbaev jýrnalısterge.
2019 jyldyń jeltoqsanynda Astana qalasynyń máslıhaty «Biryńǵaı dızaın-kod» erejesin bekitken. Pandemııa bastalǵan soń, bul erejelerdi oryndaý keıinge qaldyrylǵan.
Spıkerdiń aıtýynsha, dızaın-kodty ornatý boıynsha is-sharalardy jergilikti bılik bıylǵy aqpan aıynda bastaǵan.
«Bizdiń bilýimizshe, tıisti túsindirmeler jasalmady. Bıyl naýryz aıynda bizge jarnamalyq qyzmetpen aınalysatyn kásipkerler júgindi, biz óz alańymyzǵa jergilikti atqarýshy organ ókilderin shaqyrdyq, olardan mańdaıshalar men jarnamanyń qalaı jasalý keregin túsindirýdi suraǵan edik.
Bir mańdaıshany jasaý shamamen 2 mln teńge turady. Bankterdiń birine mańdaıshany ózgertý talaby qoıylyp otyr, barlyq mańdaıshany ózgertýge orasan zor qarajat ketedi», - dep atap ótti palata ókili.
Bul rette palata jergilikti atqarýshy organdar qoldanystaǵy zańnamany buzdy dep esepteıdi. Máselen, Kásipkerlik kodekstiń talaptary buzylǵan, óıtkeni palata bızneske qatysty zańsyz tekserý júrip jatqanyn aıtyp otyr.
Kásipkerler ákimshilik quqyqbuzýshylyq belgileri de bar ekenin aıtyp otyr:
- 173-bap «Laýazymdy adamdardyń kásipkerlik qyzmetke zańsyz aralasýy», 100 AEK mólsherinde aıyppul salýǵa ákep soǵady;
- 175-bap «Jeke kásipkerlik sýbektilerine tekserý júrgizý tártibin buzý», 20 AEK aıyppul salý kózdelgen;
- 175-1-bap «Jeke kásipkerlik sýbektilerine barý arqyly baqylaý men qadaǵalaýdyń ózge de nysandaryn zańsyz júrgizý».
Ákimdik jaýaby qandaı?
«Astanada qala kelbetin dızaın-kodqa sáıkestendirý boıynsha belsendi jumystar jalǵasyp jatyr. Elordanyń barlyq bes aýdanynda turaqty túrde kásipkerlerge túsindirý jumystary júrgizilýde. Jyl basynan beri elordada 2700-ge jýyq banner, jarnamalyq mańdaıshalar, onyń ishinde dızaın-kodqa sáıkes kelmeıtin dóńgelekterdegi jarnamalar alynyp tastaldy. Bes aýdan ákimdiginiń qyzmetkerleri zańsyz jáne sáıkes kelmeıtin jarnamanyń dızaın-kodyn túsindirý jáne bólshekteý boıynsha kóshpeli is-sharalar ótkizip júr. Kásipkerlermen tıisti áńgimeler júrgiziledi, dızaın-kodqa sáıkes kelmeıtin mańdaıshalardy aýystyrý qajettiligi týraly býkletter beriledi», - dep jaýap berdi qala ákimdigi.
Osylaısha, ákimdik ǵımarattardyń nemese qurylystardyń qasbetterine mańdaıshalardy ornalastyrý tujyrymdamasy bar ekenin, onda bıznes ókilderine elordanyń arhıtektýralyq kelbetin bir stılde júzege asyrý úlgisi kórsetilgenin aıtqan.
