Dıera Keldıerova uzaq úzilisten keıin tatamıge oralyp, Aqtaýda chempıon atandy
ASTANA. IKAZINFORM — Parıj Olımpıadasynyń chempıony, ózbekstandyq dzıýdoshy Dıera Keldıerova uzaq úzilisten keıin tatamıge qaıta oralyp, Aqtaýda ótip jatqan halyqaralyq týrnırde top jardy, dep jazdy INFORMSPORTS.
17-18 qazan kúnderi Aqtaý qalasynda dzıýdodan Turar Joldybaevty eske alýǵa arnalǵan ashyq Azııa kýbogy ótip jatyr.
Áıelder arasynda 52 kelige deıingi salmaq dárejesinde beldesken Dıera Keldıerova fınalda ázerbaıjandyq Farıda Mırzaevamen kezdesti. Sheshýshi beldesýde ózbekstandyq sportshy qarsylasyn merziminen buryn jeńip, altyn medalǵa qol jetkizdi.
Atalǵan salmaqta qazaqstandyq dzıýdoshylar da júldesiz qalǵan joq. Nuraıym Sársenbek pen Gúlhan Shyńǵyshan qola medal ıegerleri atandy.
Aıta keteıik, bul Dıera Keldıerova úshin 2024 jyly Parıjde ótken Olımpıada oıyndaryndaǵy tarıhı jeńisinen keıingi alǵashqy resmı jarys boldy. Olımpıadadan soń sportshy ana atanýyna baılanysty biraz ýaqyt jarystarǵa qatyspaǵan edi.
Osylaısha, Olımpıada chempıony úlken sportqa qaıta oralýyn altyn medalmen atap ótti.
Aqtaýdaǵy halyqaralyq dodaǵa jeti memleketten 180-nen astam dzıýdoshy qatysyp jatyr.
