Dıvıdendterden qarajat kóp tússe, salyq salynýy kerek – Erulan Jamaýbaev

ASTANA. KAZINFORM – QR Ulttyq banki tóraǵasynyń birinshi orynbasary Erulan Jamaýbaev ekinshi deńgeıli bankterdiń aktsıonerleri alatyn dıvıdendterine salyq salý usynysyna pikir aıtty.

- Dıvıdendke qatysty ártúrli oı bar. Bank nemese munaı-gaz óndirip otyrǵan kompanııanyń ıesi «jaman» dep aıtýǵa bolmaıdy, barlyǵy birdeı. Kez kelgen bıznesmen paıda tabýǵa jumys istep, jumys oryndaryn qurady, salyq tóleıdi. Jalpy, usynys (aktsıonerler alatyn dıvıdendterine salyq tóletý) durys. Dıvıdendter artylyp jatsa, tóletý kerek. Biraq qazirdiń ózinde bank salasyna júktemeni kóterip otyrmyz, - dedi E.Jamaýbaev Parlament Májilisinde tilshiler suraǵyna jaýap bere otyryp.

Budan buryn habarlanǵandaı, búgin Májilistiń jalpy otyrysynda depýtat Ermurat Bapı bankterden dıvıdend alatyn aktsıonerlerine salyq salý normasyn usyndy.

Óz kezeginde Premer-mınıstrdiń orynbasary – Ulttyq ekonomıka mınıstri Serik Jumanǵarın dıvıdendterge salyq salýǵa qatysty naqty usynys bolsa, Úkimet qoldaıtynyn aıtty.

Onyń sózine qaraǵanda, bul talap tek bankterge ǵana emes, sonymen qatar dıvıdend alatyn barlyq adam men uıymdarǵa qatysty bolady.