«Dıýanı luǵat at-túrk» sózdiginiń 950 jyldyǵy: Elordada halyqaralyq kórme ashyldy
ASTANA. KAZINFORM – Elordadaǵy Ulttyq mýzeıde «Dıýanı luǵat at-túrk» entsıklopedııalyq sózdiginiń jaryq kórgenine 950 jyl tolýyna oraı «Til izgiliktiń bastaýy: Dıýanı luǵat at-túrk» atty halyqaralyq kórme ashyldy.
Kórmede Mahmud Qashqarıdyń sýretteri, «Dıýanı luǵat at-túrk» eńbeginiń eń jaqyn kóshirmesi, túrik jáne qyrǵyz tilinde usynylǵan túpnusqa, XI ǵasyrdaǵy túrik qoǵamyn beıneleıtin erler men áıelderdiń kıimderi, sol kezeńniń ómir salty men mádenı kórinisin beıneleıtin jádigerler usynyldy.
— XI ǵasyrda uly ǵalym Mahmud Qashqarı jazǵan «Dıýanı luǵat at-túrk» eńbegi tek ádebıet eskertkishi ǵana emes, túrki halyqtarynyń aıshyqty beınesi. Bizdiń mádenıetimiz ben dástúrlerimizdiń, urpaqtar sabaqtastyǵynyń aıqyn kórinisi. Ózderińiz biletindeı, ıÝNESKO sheńberinde 2024-2025 jyldary kitaptyń 950 jyldyǵy toılandy. Bul eńbek Orhon eskertkishterinen keıingi túrki mádenıetiniń eń mańyzdy eskertkishi, - dedi kórmeni ashqan Túrki mádenıeti jáne murasy qorynyń prezıdenti Aqtoty Raıymqulova.
Onyń aıtýynsha, bul kórme ótken jyly Bishkek qalsynda ótken Túrki memleketteri uıymy memleket basshylarynyń HІ sammıti aıasynda alǵash ret uıymdastyrylǵan.
— 2024 jylǵy 13 jeltoqsanda ıÝNESKO-nyń Parıjdegi shtab páterinde arnaıy kórme men álemdik deńgeıdegi jáne túrki dúnıesi ǵalymdarynyń basyn qosqan halyqaralyq ǵylymı fonferentsııany ótkizdik. Sonymen qatar kóshpeli kórme 2025 jyly álemniń ártúrli mádenıet uıymdarynda kórsetiletinin erekshe atap ótkim keledi, - dedi Aqtoty Rahmetollaqyzy.
Aıta keteıik, osy jıynda Aıda Balaeva Túrkistanda restavratorlar daıarlaýdy usyndy.