Dıssertatsııa jazǵanda, jasandy ıntellekt qoldanýǵa ruqsat beriledi – Saıasat Nurbek

ASTANA. KAZINFORM – Ǵylym jáne joǵary bilim mınıstri Saıasat Nurbek ǵylymı jumystar men dıssertatsııa jazǵanda jasandy ıntellekt qoldaný erejesin túsindirip berdi.

«Jasandy ıntellektimen jumys isteý taqyrybynda biz qazir joǵary bilim salasynda ózimizdiń zańnamalyq erejelerimizdi ózgertip kele jatyrmyz. Mysaly, endi dıssertatsııa jazǵanda, magıstrlik, doktorlyq nemese stýdenttik jumystardy jazǵanda, jasandy ıntellektini qoldanýǵa ruqsat beremiz. Tek bir shartpen – mindetti túrde «Bul mátin JI kómegimen jasalǵan» dep kórsetý kerek. Sonda baǵalaýshy oqytýshy stýdenttiń JI-di qalaı qoldanǵanyn qaraıdy», - dedi Ǵylym mınıstri elordada «Digital Kazakhstan: zamanaýı bilim berý» atty Tamyz sammıtinde. 

S. Nurbek jasandy ıntellekt – áleýetti arttyratyn óte qýatty qural ekenin atap ótti. 

«Meniń de jeke pozıtsııam, basqa da sarapshylar munymen kelisip otyr – jasandy ıntellektiden qoryqpaýymyz kerek, ony túsine bilýimiz kerek jáne aqyryndap birinshi kezekte oqytýshylarymyzdy, sosyn oqýshylarymyzdy JI-di durys qoldana bilýdi úıretý kerek. Ol áleýetti arttyratyn óte qýatty qural, biraq ony túsinbesek syrtta qalamyz degen qaýip bar», - dedi mınıstr.

Aıta keteıik, buǵan deıin Úkimet basshysynyń orynbasary Tamara Dúısenova kolledj ozattaryn JOO-ǵa emtıhansyz qabyldaý tájirıbesin qaıtarý kerek degen bolatyn.