Dıssertatsııa qorǵaý onlaın formatqa kóshedi - mınıstrlik

NUR-SULTAN. QazAqparat – Mektep dırektorlary 3 jyl saıyn attaestatsııadan ótip turýǵa mindettelip otyr. Bul synnan jaqsy nátıje kórsetken basshylar aı saıyn aılyǵynyń 100 paıyzy kóleminde ústeme aqy alýy múmkin. QR Bilim jáne ǵylym mınıstri Ashat Aımaǵambetov Facebook-tegi paraqshasynda osy ózgeristerdiń ómirge qalaı engizilip jatqanyn túsindirdi, dep habarlaıdy QazAqparat tilshisi.

Mınıstr 2021 jyly iske asqan bastamalardy sanamalaı kelip, mektepke deıingi tárbıe men oqytýdy damytýdyń jańa modeli ázirlengenin aıtady. Budan bylaı balabaqshalarda dástúrli 20 mınýttyq sabaqtyń ornyna oıyn jáne kommýnıkatsııa ádistemesi engiziledi.

Sondaı-aq ol 2021 jyly UBT elektrondy formatqa kóshirilgenin, doktorantýraǵa túsý úshin emtıhan alǵash ret ortalyqtandyrylyp, elektrondy formatta ótkizilgenin, magıstratýraǵa jáne doktorantýraǵa túsý múmkindigi talapkerlerge jylyna eki ret berile bastaǵanyn atady.

«Dıssertatsııalyq keńes qyzmetteriniń Erejeleri tolyǵymen ózgerdi. Olardyń jumystarynyń sapasyn jaqsartý mańyzdy. Bizdiń Komıtetke 40-qa jýyq keńestiń jumysyn toqtatýǵa týra keldi. Sonymen qatar osy Erejeler qabyldanǵannan keıin qorǵalatyn barlyq dıssertatsııalar qoljetimdi boldy. Al qorǵaý protsedýrasy endi mindetti túrde onlaın-translıatsııa arqyly júzege asyrylady. Bul Erejelerde basqa da mańyzdy normalar qarastyrylǵan», - dep jazdy Ashat Aımaǵambetov.