Dısplazııany emdeýde bárinen de ájelerimizdiń ádisi tıimdi
ASTANA. 24 qarasha. QazAqparat - Qazir shyr etip dúnıe esigin ashqan sábılerge ortan jiliktiń urshyq basy dısplazııasy degen dıagnoz kóp qoıylatyn boldy.
«Jalpy, dısplazııa degen qandaı aýrý, ol neden paıda bolady, onyń aldyn alý úshin ne isteý kerek?» degen suraqtarǵa «Alash aınasy» gazetinde ortoped maman Jumahan Moldaqulov jaýap beredi: «Negizi, dısplazııanyń túrleri óte kóp. Sonyń ishinde urshyq basy dısplazııasy týraly aıtatyn bolsaq, bul náreste ananyń jatyrynda jatqan kezinde súıekteri men jilikteriniń durys damymaýynan paıda bolady. Buǵan tuqymqýalaýshylyq, anasynyń júkti kezinde túrli syrqattarmen aýyrýy, sábıdiń iri bolýy, ekologııalyq jaǵdaı, durys tamaqtanbaý - osynyń bári áser etedi. Muny der kezinde emdemese, bala aıaǵynyń kemistigine, bir aıaǵynyń ekinshisinen qysqa bolýyna ákelip soǵady. Muny emdeý úshin ortoped dárigerler náresteniń býyndaryn sylap-sıpap, fızıoterapııa jasap, emdik úzeńgi kıgizedi. Bul jerde ata-analar da náreste dúnıege kelgen soń onyń býyndaryna massaj jasap, qımyldatyp otyrýy kerek. Buryn ájelerimiz náreste dúnıege kelgennen bastap, besikte uıyqtap turǵan saıyn sábıdiń jaýyryny jabysyp qalmasyn, qozǵalysta bolsyn dep únemi aıaq-qoldaryn tartyp, sylap-sıpap otyratyn. Qazirgi ata-analar osyny az jasaıdy. Sondyqtan men buǵan asa mán berý kerektigin aıtar edim».
