Dısneıdiń taǵy bir mýltfılmi qazaq tiline dýblıajdaldy
Disney/Pixar stýdııasynyń mýltıplıkatsııalyq fılmi, osymen «Bolashaq» korporatıvtik qory men «Meloman» kompanııasynyń bastamasymen «Ózińnen basta» jobasy aıasynda dýblıajdaǵan 34-shi týyndy bolyp otyr, dep habarlaıdy QazAqparat tilshisi.
Aldyn-ala kórsetilim barysynda sóz sóılegen «Nur Otan» partııasy tóraǵasynyń birinshi orynbasary jáne «Bolashaq» qory Qamqorlyq keńesiniń qurmetti múshesi Baýyrjan Baıbek el tarıhyndaǵy kúrdeli kezeńderdiń biri bolǵan táýelsizdiktiń alǵashqy jyldarynda Tuńǵysh Prezıdent Nursultan Nazarbaevtyń «Bolashaq» stıpendııasyn taǵaıyndaǵanyn atap ótti. Búgingi tańda biregeı baǵdarlamanyń myńdaǵan túlekteri Otanyna qaıtyp oralyp, el ekonomıkasynyń túrli salalarynda jumys isteýde. 2011 jyly bolashaqtyqtar qazaq tildi balalarǵa arnalǵan sapaly jáne básekege qabiletti kontent qurýǵa baǵyttalǵan «Ózińnen basta» áleýmettik jobasyna bastamashy boldy. Bastamaǵa «Nur Otan» partııasy qoldaý kórsetti.
«Jahandaný kezeńinde óz tarıhyna tereń tamyr jibergen, ulttyq mádenıeti men ana tilin ardaqtaı bilgen halyqtyń ǵana árdaıym aıy ońynan týmaq. Sondyqtan da «Nur Otan» elimizdegi ózge ult ókilderiniń tóltýma qasıetteriniń saqtalýyn qýattaı otyryp, qazaq tilin, mádenıeti men dástúrin damytýdy óz strategııalyq basymdyqtarynyń biri retinde belgilegen. Budan toǵyz jyl buryn Elbasynyń tikeleı qoldaýymen qolǵa alynǵan «Ózińnen basta» áleýmettik jobasynyń arqasynda osy kezge deıin álemdegi eń úzdik 34 kórkem jáne anımatsııalyq balalar fılmi qazaq tilinde dýblıajdaldy. Osy bastamaǵa qyzý qoldaý bildirip, qazaq tiliniń bolashaǵyna beıjaı qaramaıtyn barsha demeýshiler men metsenattarǵa erekshe alǵys bildiremin» - dep atap ótti Baýyrjan Baıbek.
Tuńǵysh ret qazaq dýblıajynyń tarıhynda fılmdegi mátindik jazýlar bir izge túsirilip, yńǵaıǵa keltirildi.
«Týyndyny jasaý barysynda biz shyǵarmashylyq adamdarymen kóp jumys jasadyq. Bul dýblıaj tarıhyndaǵy jańa kezeń boldy. Men bul sátti uzaq kúttim. Tipti, osy jazbalarǵa kastıng te jarııalandy. Biz eń úzdigin tańdap alýy úshin Disney/Pixar stýdııasyna qazaq tilindegi birneshe úlgi jiberdik. Fılmdi dýblıajdaý úshin úlken eńbek jasalǵanyn kórermender túsinse deımin», - dedi dýblıajdyń rejısseri Shah-Mýrat Ordabaev.
Jalpy 9 jyl ishinde «Muzdy ólke-2», «Kólikter 2», «Batyl júrek», «Koko qupııasy», «Moana», «Malefısenta», «Aladdın» jáne taǵy da basqa týyndylar dýblıajdalǵan. Dýblıaj salasyndaǵy 200-den astam, ishinde rejısserlar, mýzykalyq jetekshiler, dybys rejısserlary, aýdarmashylar men akterlar da bar otandyq mamandar Disney stýdııasynyń halyqaralyq standarttaryna sáıkes bilimderin jetildirdi.
