Disney stýdııasynyń kezekti týyndysy qazaq tilinde sóıleıdi
ALMATY. KAZINFORM — Almatyda álemdik stýdııa usynǵan jańa fılmniń jabyq kórsetilimi ótti.
Disney stýdııasynyń «Lılo men Stıch» fılmi qazaq tiline dýblıajdaldy. Kınotýyndynyń basty keıipkerleriniń biri Stıchti — dýblıaj rejısseri, akter Shah-Murat Ordabaev, ekinshi basty keıipker Lılony — jas aktrısa Aızere Berkinbaı, Nanıdi — aktrısa Aıjuldyz Adaıbekqyzy, Plıklıdi — tele-radıo júrgizýshi Qazbek Qasym, Devıdti — stendap-ázilkesh Rýslan Taı dybystady.
— Bul osy jyly qazaqsha dybystalǵan ekinshi fılm. Birinshisi «Aqshaqar» boldy. Kórermenniń qazaqtildi fılmderge qyzyǵýshylyǵy tek ósip keledi jáne kórermenimiz talǵampaz bolyp bara jatyr. Ol dýblıaj salasynda júrgen adamdardyń áli de jetilýi kerek, áli de ósýi kerek degen sóz. Kórermen talǵamy ósken saıyn soǵurlym saı bolýymyz kerek. Jalpy suranys bar, bul qýantady, — dedi dýblıaj rejısseri Shah-Murat Ordabaev.
Sonymen qatar ol bıyl Disney stýdııasy taǵy eki fılmdi — «Janýarlar álemi» (Zootopia) jáne «Avatar 3» týyndylaryn qazaq tilinde dybystaýdy josparlap otyrǵanyn atap ótti.
Al Lılony dybystaǵan 9 jastaǵy Aızere Berkinbaı bul jumystan kóp tájirıbe jıǵanyn aıtty.
— Men 133 mektep-gımnazııasynda oqımyn. Bul meniń alǵashqy jobam emes, buǵan deıin de birneshe mýltfılmde dýblıaj jasadym. Biraq osy fılmde jańa tájirıbe aldym. Sebebi keı tusta aıqaılaýym kerek boldy, jylaıtyn tustary da boldy. Bolashaqta aktrısa bolýdy armandaımyn, — dedi ol.
Fılm 22 mamyr kúni qalyń kórermenge jol tartady.
Eske salaıyq, byltyr Disney stýdııasy «Oıjumbaq 2», «Moana 2», «Mýfasa. Arystan patsha» atty úsh fılmin qazaq tiline aýdarýǵa tapsyrys berip, dýblıaj jumystaryn qarjylandyrdy.