Disney stýdııasynyń kezekti anımatsııalyq fılmi qazaq tilinde sóıledi
ASTANA. KAZINFORM – Astanada halyqaralyq «Qazaq tili» qoǵamynyń uıytqy bolýymen Disney stýdııasynyń «Moana 2» anımatsııalyq fılmi qazaq tilinde kórermenge jol tartty.
«Disney stýdııasynyń «Moana 2» anımatsııalyq fılminiń qazaq tilindegi nusqasy kórermenge jol tartty. Bul Disney stýdııasynyń bizdiń usynysymyz boıynsha, óz qarajatyna aýdarylyp jatqan ekinshi fılm. Jyl aıaǵyna deıin taǵy bir fılm jáne kelesi jylǵa taǵy bir fılmdi qazaq tilinde usyný josparlanǵan. Іri halyqaralyq stýdııalardyń qazaq tiline bet burýy, bul óte mańyzdy. Árıne, elimizde buǵan deıin de álem fılmderi qazaq tilinde dýblıaj jasalyp, kórermenge usynylyp keledi, biraq olar demeýshilerdiń qoldaýymen júzege asyryldy. Úlken stýdııalar óz týyndysyn álemniń 30 shaqty tiline aýdaryp usynady, endi solardyń qatarynda qazaq tili de bar», - dedi «Qazaq tili» qoǵamynyń prezıdenti Raýan Kenjehanuly álemdik týyndynyń qazaq tilindegi kórsetilimi barysynda.
Onyń aıtýynsha, álemdik anımatsııalyq fılmdi qazaq tiline aýdarýdaǵy maqsat – ana tilin ulyqtaý, balalardy qazaqsha sóılep, oılaýǵa baýlý.
Aıta ketsek, atalǵan mýltfılm qazaq tilinde elimizdiń barlyq kınoteatrynda kórsetiledi jáne demalys kúnderi qolaıly ýaqytqa qoıylǵan.
«Dýblıaj – óz aldyna bólek ındýstrııa. Onyń Qazaqstanda keńinen damýy óte mańyzdy. Al qazaq dýblıajynyń aldynda turǵan mindet, kez kelgen álemdik fılmdi qazaqy bolmysqa keltirip, qazaqy ortaǵa beıimdep aýdaryp, kórermenge usyný. Ol úshin tájirıbe kerek, sol úshin de bizge qazaq tilindegi dýblıajdalǵan fılmderdiń qataryn kóbeıtý kerek. Buny iske asyratyn otandyq stýdııalar men mamandar, basqa jaǵynan alyp qarasań jańa jumys oryndary ashylady degen sóz», - deıdi R. Kenjehanuly.
«Moana 2» anımatsııalyq fılminiń dýblıaj rejısseri Shah-Murat Ordabaev álemdik premeranyń qazaq tiline aýdarý barysyna toqtaldy.
«Búginde qazaq tilinde dybystalǵan 40-tyń ústinde fılm bar. Disney aýqymdy konglomerat bolǵandyqtan dybystaý biryńǵaı júıege negizdelgen. Búgingi kórsetilimniń materıaldaryn biz 3-4 aı buryn aldyq, al qazaq tilindegi treılerdi jarty jyl buryn daıyndap qoıdyq. Aldymen túpnusqa mátin qazaq tiline aýdarylady sodan soń keıipkerdiń mımıkasyna qaraı úılestiriledi, oǵan arnaıy maman shaqyrylady. Osy sátte basty keıipkerlerdi dýblıaj jasaıtyn ártisterge kastıng jarııalanady jáne árbir keıipkerge kem degende 4-5 úmitkerdi usynamyz, sońǵy sheshimdi avtorlyq kompanııa qabyldaıdy. Fılmdi dybystaý eki aptadaı ýaqyt alady, eger mýzykalyq fılm bolmasa 10 kúnniń ishinde aıaqtaýǵa bolady, al mýzykalyq bolsa 15-20 kún ýaqyt qajet», - dedi Shah-Murat Ordabaev.
Rejısserdiń paıymdaýynsha, elimizde dýblıaj jasaıtyn ártister jetkilikti jáne tehnıkalyq múmkindik te bar.
«Qarjyny únemdeý jolynda sapany attap ketken kompanııalar óte kóp, onyń kesiri dýblıajǵa kesirin tıgizedi. Taǵy bir másele ana tili qundylyǵy, mysaly, keıbir Eýropa elderinde tildi saqtap qalý úshin Úkimet kınoteatrlarǵa ana tilinde kórsetilgen fılmder úshin salyqtyq jeńildik qarastyrylǵan», - deıdi rejısser.
Disney stýdııasynyń kezekti anımatsııalyq fılmi keıipkerlerin qazaq tilinde sóıletkender qatarynda Moana – qazaq tilinde Quralaı Ótepovanyń daýysymen sóıleıdi. Qazaqstandyq ánshi Nazıma Moananyń barlyq ánin oryndaıdy. Sonymen qatar aktrısa Aınur Bolat Moana men Maýıge qater tóndiretin Matangıdi dybystady, al Matangıdiń ánderin Gaýhar Ómirzaqova oryndasa, ártis Qobylandy Bolat alpamsadaı jartylaı qudaı Maýıdi dybystady. Odan bólek Baqytjan Álpeıis kúńkildek baǵban jáne Moana tobynyń múshesi Keleni qazaq tilinde sóıletti.
Qazaq tilindegi álemdik týyndynyń jabyq kórsetilimine jınalǵandardyń qatary kóp boldy, sonyń biri, qurmetti qonaq QR Ǵylym jáne joǵary bilim mınıstri Saıasat Nurbek.
«Moana 2» anımatsııalyq fılminiń qazaq tilindegi nusqasyn qoldap, balalarymmen birge kórýge arnaıy keldim. Qazirgi álemde mazmuny tereń dúnıege talasýda, Hollywood, Netflix, Disney stýdııasy taǵy basqa álemdik iri kompanııalar kontent izdep jatyr. Úlken serpilis, tolqyn Marvel stýdııasynda boldy, biraq ol taqyryptar da bitip jatyr, jańashyldyq kerek, al bul Qazaqstan úshin jańa múmkindik, onyń dáleli búgin Moana álemdik balalar keıipkeri qazaq tilinde sóılep jatyr», - deıdi Saıasat Nurbek BAQ ókilderine suhbat bere turyp.
Mınıstrdiń pikirinshe, qazaq ertegi keıipkerlerin (Jeztyrnaq, Aqsaq qulan, Ertóstik taǵy sol sııaqty) halyqaralyq sahnaǵa shyǵarýda áleýetimiz bar.
«Bizdiń tyń ıdeıalardy usyný múmkindigimiz bar. Shetelde oqyp, tájirıbe jınap kelgen otandyq mamandar aıaqtan turyp jatyr. Otandyq kınematografııada oń serpilis bar, sol arqyly ana tildi ilgeriletýdiń jaqsy bir kórinisi – álemdik deńgeıdegi fılmderdi qazaq tilinde sóıletý», - dedi ol.
Buǵan deıin Almatyda qazaq tiline dýblıajdalǵan Disney stýdııasynyń «Moana 2» anımatsııalyq fılminiń jabyq kórsetilimi boldy.