Disney mýltfılmi qazaq tilinde kórsetildi
ASTANA. QazAqparat - Astanada «Nur Otan» partııasynyń qoldaýymen Sýperotbasy-2 mýltfılminiń aldyn ala kórsetilimi ótti, dep habarlaıdy QazAqparat tilshisi.
Walt Disney Pictures jáne Pixar stýdııalary kópten kútken Sýperotbasy-2» fılmin qazaq tilinde kórermenderge usyndy.
14 jyl ótken soń, «Sýperotbasy» anımatsııalyq fılminiń jankúıerleri kópten kútken oqıǵanyń jalǵasyn kórýge múmkindik aldy. Osy ýaqyttyń ishinde kóp nárse ózgerdi, biraq «Sýperotbasy» keıipkerleri sol qalpynda qaldy. Fılmniń ekinshi bóliminde rejısser Bred Berd barlyq nazardy Mıster «Erekshege» emes, onyń jubaıyna aýdarýdy uıǵardy. Fılmniń jelisi boıynsha Helen Parr otbasynyń kóshbasshysy, al onyń kúıeýi Djek-Djek balaqaıdyń tárbıesimen aınalysatyn bolady. ıAǵnı, kórermender bul joly jaqsy kóretin Mıster «Ereksheni» basqa qyrynan kóredi. Ol endi sýperbatyr kostıýminde paıda bolmaıdy, onyń esesine áıeli ǵalamdy qutqarý úshin qaýipti mıssııaǵa bara jatqanda, úsh balaǵa qamqor bolyp qalady.
«Sýperotbasy-2» - «Bolashaq» Qaýymdastyǵynyń Korporatıvtik Qorymen qazaq tiline dýblıajdaǵan 24-shi fılm bolyp tabylady. Qazaq tilindegi dýblıaj rejısseri - Shah-Murat Ordabaev.
«Men úshin «Sýperotbasy-2» fılmi «Kokonyń qupııasy», «Galaktıka saqshylary. 2 bólim» jáne «Órmekshi-adam. Qaıta oralý» fılmderinen keıingi jobadaǵy tolyqqandy tórtinshi jumysym. Bul fılm bizdiń ata - analarymyz, bizdiń sýperbatyrlarymyz jaıly. Bul fılmdi dýblıajdaý barysyna tek teatr ártisteri ǵana emes, sondaı-aq kınoakterlar da qatysty. Árdaıym biz jańa akterlerdi ashýǵa tyrysamyz. Dýblıaj akterlerin izdestirý maqsatynda biz úlken kastıng ótkizdik. Uzaq ýaqyt boıy Vıoletta keıipkeri úshin daýys taba almadyq, fılmniń dýblıaj toby teatrdyń jas aktrısasy - Aıkórkem Ádilgereevany ashpas buryn, búkil Qazaqstan boıynsha izdeý júrgizdik»,-dedi dýblıaj rejısseri Shah-Murat Ordabaev.
Onyń sózinshe, basty keıipkerlerdiń biri - Jelaıaqty jas akter Dıdar Quralbaev dybystady. Onyń jasy nebary 11-de, soǵan qaramastan, ol «Kokonyń qupııasy» mýltfılmin dýblıajdaǵan Aqarys Áshimhanǵa jaqsy básekeles bola alady.
«Bir qyzyǵy, fılmmen jumys barysynda men áıel adamdy dybystadym. Edna Mod - birqıly minezdi sýperbatyrlarǵa arnalǵan kıim dızaıneri, men dybystaǵan 20-shy Disney keıipkeri. Jalpy aıtqanda, dýblıajǵa 60-tan asa akter qatysty. Qorytyndylaı kelsem, «Sýperotbasy-2» - mahabbat pen ázilge toly jyly otbasylyq mýltfılm. Men kórermenderge qazaq tilindegi nusqasyna búkil otbasymen barýǵa usynamyn», - dedi Shah-Murat Ordabaev.
Astana jáne Almaty qalalaryndaǵy aldyn ala qoıylǵan kórsetilimge dýblıaj akterlary, demeýshiler, mádenı jáne shyǵarmashylyq ıntellıgentsııa ókilderi, jastar uıymdarynyń ókilderi, balalar úıiniń tárbıelenýshileri, BAQ ókilderi qatysty.
Balalarǵa arnalǵan bazarlyq «Sýperotbasy-2» mýltfılmin 14 maýsymnan bastap elimizdiń barlyq kınoteatrlarynan qazaq tilinde kórýge bolady.
