Disney kompanııasynyń kezekti fılmi qazaq tilinde sóıleıdi
ALMATY. KAZINFORM — Disney kompanııasy óz qarajatyna «Ańdar shahary 2» fılmin qazaq tilinde dýblıajdady.
«Ańdar shahary 2» fılminiń qazaq tilindegi nusqasynda aktrısa, bloger Sabıra Jarasqyzy basty keıipkerlerdiń biri Djýdı Hoppsty daýystady. Akter Baqytjan Álpeıis — Mılton esimdi keıipkerdi, sondaı-aq Asan Májit — Kapıtan Býıvolsondy, Erkebulan Daıyrov — Dáý Myrzany dybystady.
Anımatsııalyq fılmniń dýblıaj rejısseri bolǵan Shah-Murat Ordabaev memlekettik tildegi fılmderge tek kınoteatrlar ǵana emes, onlaın-kınoteatrlarda suranys artqanyn atap ótti. Aıtýynsha, jyl sońyna deıin taǵy bir fılm qazaq tilinde jaryq kóredi, ol — ataqty rejısser Djeıms Kemeronnnyń «Avatar: ot pen kúl» fılmi.
Alaıda Shah-Murat Ordabaev qazaq tilinde dybystalǵan fılmderge qatysty másele bar ekenin de jasyrmady. Onyń sózinshe, kınoteatrlar qazaq tilinde dybystalǵan fılmniń seanstaryn kóbeıtýden áli de tartynady.
— Kınoteatrlar — jekemenshik kásip bolǵandyqtan, olar birinshi kezekte tabysty oılaıdy. Biraq halyq qoldaýy artsa, jaǵdaı ózgerýi múmkin, — dedi ol.
Eske salaıyq, byltyr álemdik kınokompanııa «Oıjumbaq 2», «Moana 2», «Mýfasa. Arystan patsha» atty úsh fılmin qazaq tiline aýdarýǵa tapsyrys berip, dýblıaj jumystaryn qarjylandyrdy.
Al 2025 jyly Disney stýdııasy «Elıo» fılmin qazaq tiline dýblıajdady.
Sondaı-aq bıyl «Lılo men Stıch» fılmi qazaq tilinde sóıledi.