Disney kompanııasy búkil álem boıynsha qyzmetkerlerin qysqartyp jatyr

ASTANA. KAZINFORM — Disney kompanııasy kıno, teledıdar jáne qarjy bólimderin qosa alǵanda, búkil álem boıynsha birneshe júzdegen qyzmetkerin jumystan shyǵaratynyn málimdedi, dep jazady AZERTADJ.

BBC-diń habarlaýynsha, oıyn-saýyq ındýstrııasynyń alyby kabeldik teledıdarǵa jazylýshylar sanynyń azaıýy jáne strımıngtik platformalarǵa kóshýinen qysymǵa ushyrap jatyr.

— Bizdiń ındýstrııa tez ózgerip jatqandyqtan, biz tutynýshylar joǵary baǵalaıtyn zamanaýı shyǵarmashylyq pen ınnovatsııany qoldaı otyryp, bıznesti tıimdi basqarýdyń joldaryn únemi qarastyryp kelemiz, — dedi kompanııa ókili BBC-ge bergen suhbatynda.

Bul qysqartý — Disney kompanııasy bas dırektory Bob Igerdiń 5,5 mıllıard dollar únemdeýge baǵyttalǵan jospary aıasynda 2023 jyly 7 myń qyzmetkerdi jumystan bosatqannan keıingi kezekti tolqyn.

Qysqartý kompanııanyń kóptegen bólimshesine, sonyń ishinde kıno men teledıdar salalaryndaǵy marketıng, kastıng, jobalardy damytý jáne korporatıvtik qarjy bólimderine áser etedi.

— Biz bul sheshimdi jedel qabyldadyq, jumystan bosatylǵan qyzmetkerlerdiń sanyn barynsha azaıtýǵa tyrystyq, — dedi Disney ókili. 

Alaıda, kompanııa birde-bir bólim tolyq jabylmaıtynyn atap ótti.

Kalıfornııalyq kompanııada búginde 233 myń adam jumys isteıdi, onyń 60 myńnan astamy — AQSh aýmaǵynan tys jerlerde. Disney oıyn-saýyq ındýstrııasyndaǵy Marvel, Hulu jáne ESPN sııaqty kóptegen kompanııanyń ıesi.

Mamyr aıynda Disney alǵashqy úsh aıdaǵy tabysy kútkennen joǵary bolǵanyn habarlady: jalpy tabys — 23,6 mlrd dollar, bul ótken jyldyń sáıkes kezeńimen salystyrǵanda 7%-ǵa joǵary. Kompanııa muny Disney+ strımıngtik qyzmetine jańa jazylýshylar sanynyń artýymen baılanystyrdy.

Bıyl Disney birneshe jańa fılm shyǵardy, sonyń ishinde «Kapıtan Amerıka: Jańa batyl álem» jáne «Aqshaqar». Alaıda «Aqshaqardyń» kórkem fılm remeıki kórermender tarapynan kútkendeı jyly qabyldanbady, kóptegen teris pikirge tap boldy.

Al Disney-diń sońǵy týyndysy — «Lılo men Stıch» AQSh-ta ótken demalys kúnderi kassalyq tabys boıynsha rekord ornatty. Box Office Mojo dereginshe, mamyrda shyqqan bul mýltfılmniń álemdik satylymy 610 mln dollardan asty.

Buǵan deıin elordada «Jibek joly» degen ataýmen Dısneılend salynatyny aıtyldy.