Disney Qazaqstandaǵy qandaı jobalarǵa qyzyǵyp otyr
ALMATY. QazAqparat - Disney-diń TMD boıynsha bólimi men qazaqstandyq kınematografıster áriptestikti keńeıtpek. Bul týraly Almaty film festival aıasyndaǵy forým barysynda málim boldy, dep habarlaıdy QazAqparat tilshisi.
Búginde atyshýly kompanııa Qazaqstanmen mýltfılmderdi qazaq tiline sapaly dýblıajdaý máselesi boıynsha baılanys ornatqan. «Bolashaq» korporatsııalyq qorynyń qoldaýymen Disneydiń 25 fılmi qazaq tilinde kórermenge jol tartty.
Munyń aldynda «Ýolt Dısneı Kompanı TMD» bas dırektory Marına Jıgalova-Ozkan Astanada QR Mádenıet jáne sport mınıstri Arystanbek Muhamedıulymen kezdesip, Májilis qaraýynda jatqan «QR kıno týraly zańy» aıasyndaǵy áriptestik týraly tildesken.
Disney-diń TMD boıynsha ofısi Máskeýde 12 jyldan beri jumys jasap keledi. Osy ýaqyt aralyǵynda kompanııa Reseı medıanaryǵynan eleýli oryn alyp úlgerdi.
«Qazaqstandyq kınematografıstermen kezdesý barysynda qazaqstandyq fılmderdi Reseıde kórsetý múmkindigi qaraldy. Biz Reseıdegi prokattyń kóshbasshysymyz. Qazaqstandaǵy kınolardyń da múmkindigi joǵary. Olardyń prokaty da jaqsy kórsetkishke qol jetkizedi dep oılaımyz», - dedi Marına Jıgalova-Ozkan.
Aıta ketý kerek, 1 fılmdi qazaqshaǵa dýblıajdaýǵa 150 myń AQSh dollary ketedi.
«Biz qazaq tilindegi fılmderdi praım-taım ýaqytta kórsetetin qazaqstandyq kınoteatrlarǵa salyqtyq jeńildik beretin zań qabyldaýdy qarastyryp jatyrmyz. Bul joba qazaq tilindegi sheteldik fılm qorynyń qalyptasýyna sebepshi bolady. Qazir qazaq tilindegi dýblıajdardyń ózin ózi aqtaýy týraly aıtýǵa áli erte. Biraz jyldan soń qazaq tilindegi fılm kórý qalypty jaǵdaıǵa aınalǵanda, shyǵyn óz-ózin aqtaıdy dep oılaımyn. Búginde balalardyń 60% qazaq tildi mektepte bilim alyp jatyr. Meniń kenjem mýltfılmderdi tek qazaq tilinde kóredi», - dedi «Bolashaq» korportatıvtik qorynyń dırektory Dınara Sháıjúnisova.
«Men sońǵy ret Qazaqstanda 2011 jyly bolǵanmyn. Osy ýaqyt aralyǵynda kóp nárse ózgergen. 2011 jyly eń alǵash ret «Tachkı» mýltfılmi qazaq tiline dýblıajdaldy. Ol kezde daýys tabý qıyn bolatyn. Dýblıaj ındýstrııasy, daıyn ártister bolmady. Sapaly dýblıajda adamnyń daýsy erin qımylyna sáıkes kelýi shart. Daýys túpnusqadaǵy daýysqa uqsaýy kerek. Qazir kásibı ártister bar. Almaty men Astanada sertıfıkattalǵan dybys stýdııalary da bar. Qazir tek mátin dýblıajdalmaıdy, jergilikti ártister án aıtady. Ol da úlken sapany talap etedi», - dedi «Ýolt Dısneı Kompanı TMD» bas dırektory Marına Jıgalova-Ozkan.
Aıta ketý kerek, 8 jeltoqsanda Disney «Şelkýnchık ı chetyre korolevstva» fılminiń, 22 qarashada «Ralf protıv ınterneta» qazaqsha dýblıajy kórermenge jol tartady.
