Disney-diń «Kúlbıkesh» («Zolýshka») blokbasteriniń qazaqsha nusqasy kórermenge jol tartady
ASTANA. QazAqparat - Disney-diń ǵajaıypqa toly jańa «Kúlbıkesh» («Zolýshka») fılmi qazaq tilinde jaryqqa shyǵady. Ertegi «Bolashaq» qaýymdastyǵy men «Meloman» kompanııasynyń qoldaýymen qazaq tiline aýdaryldy. Kórermender ony Halyqaralyq áıelder kúni qarsańynda 6 naýryzda kınoteatrlardan tamashalaı alady.
«Fılmdi qazaq akterleri dybystady. Kúnsulý Shaıahmetova ógeı ananyń, Shahnaza Qyzyhanova - Zolýshkanyń, Tımýr Pıazov - hanzadanyń, Sáýle Turdahanova - feıanyń, Azamat Qanapııa - kapıtannyń daýysyn keltirdi», - delingen «Bolashaq» qaýymdastyǵynyń resmı saıtynda. Disney stýdııasynyń fılminde basty rólderdi akterler Lılı Djeıms pen Rıchard Medden, «Oskar» syılyǵynyń ıegeri Keıt Blanshett pen «Oskar» syılyǵyna eki márte nomınant bolǵan Helena Bonem-Karter somdady. Fılm stsenarıin Krıs Vaıts jazdy. Dýblıaj rejısseri - Aıjan Jámshıtova. Onyń basshylyq etýimen osyǵan deıin «Kólikter-2» (Tachkı-2), «Batyl júrek («Hrabraıa serdtsem»), «Monstrlar Ýnıversıteti» (Ýnıversıtet Monstrov), «Jańa Órmekshi-adam: Kernegen qýat» («Novyı Chelovek-paýk: Vysokoe naprıajenıe»), «Jalǵyz reındjer» (Odınokıı reındjer») jáne «Malıfısenta» aýdarylǵan. Disney-diń «Zolýshka» ertegisi boıynsha túsirilgen blokbaster qazaq tiline aýdarylǵan 10-shy fılm bolmaq.
