Disney 7 myń qyzmetkerin jumystan shyǵarady
LOS-ANDJELES. QazAqparat – Disney-diń atqarýshy dırektory Bob Aıger kompanııany aýqymdy qaıta qurylymdaý aıasynda 7 myń jumys ornyn qysqartý josparlanyp otyrǵanyn málimdedi, dep habarlaıdy QazAqparat BBC News-ke silteme jasap.
Jumystan shyǵarý 5,5 mlrd AQSh dollaryn saqtap qalýǵa jáne Disney+ strımıng servısiniń tabysyn arttyrýǵa baǵyttalǵan jospardyń bir bóligi. Aıta keteıik, bul servıs 2019 jyly iske qosyldy, sol ýaqyttan beri alǵash ret jazylýshylar sany tómendep ketken.
Disney basshysy «sheshim (jumys ornyn qysqartý týraly) ońaıǵa soqpaǵanyn» málimdedi.
Bob Aıger qyzmetkerlerdi jumystan shyǵarý týraly sheshimge bylaı dep pikir bildirdi: «Álem boıynsha eńbek etken qyzmetkerlerimizdiń daryny men qaısarlyǵyna qurmetpen qaraımyn jáne bul ózgeristerdiń saldary qandaı bolaryn da túsinemin».
Solaısha, Disney-diń álem elderindegi 3,6% qyzmetkeri jumysynan aıyrylady.
Bul rette Disney ótken jyldyń qazan-jeltoqsan aralyǵynda satylym 8%, ıaǵnı 23,5 mlrd AQSh dollaryna deıin óskenin málimdep otyr.
Biraq Disney+ 1,5 mlrd dollar shyǵyn týraly aıtyp, jazylýshylar sany 2,4 mıllıonǵa azaıǵanyn, solaı 161,8 mıllıonǵa deıin tómendep ketkenin alǵa tartyp otyr.
Qaıta qurý jospary boıynsha kompanııa úsh segmentte jumys isteıdi – oıyn saýyq, oǵan kıno, teledıdar men strımıng jelileri kiredi; ESPN sport telearnasy, sondaı-aq saıabaqtar, oıyn-saýyq pen Disney kompanııasynyń ónimderi.
Osyndaı málimdemelerden keıin Disney aktsııasy keńeıtilgen saýda-sattyq barysynda 5% artty.
Foto: PATRICK T. FALLON/AFP via Getty Images
