Discovery telearnasynyń ǵımaratynda adamdardy kepildikke alǵan er azamattyń kózi joıyldy
ASTANA. Qyrkúıektiń 2-si. QazAqparat - AQSh-ta Discovery telearnasynyń ǵımaratynda adamdardy kepildikke alǵan er azamat alǵan jaraqattan kóz jumdy. Álgi azamat kepilge alynǵandardy bosatý operatsııasynyń barysynda jaralanǵan bolatyn. Oqıǵa saldarynan basqa eshkim zardap shekpegen, dep habarlady RBK agenttigi.
Úsh adamdy kepildikke alǵan qylmyskerge oq atpas buryn, polıtsııa onymen kelissóz júrgizgen, dep habarlaıdy CNN. Vashıngtonnyń 43 jastaǵy turǵyny Djeıms Lı bolyp shyqqan álgi qaskóıdiń talaptarynyń anyq-qanyǵy ázirge ashylmaı otyr. Degenmen, onyń «radıkaldy» ekolog ekeni, onyń Save the Planet Protest ekologııalyq uıymynyń belsendisi bolǵany anyqtalyp otyr.
Sondaı-aq, Djeıms Lıdiń 2008 jyly osy telearna ǵımaratynyń aldynda ruqsat etilmegen narazylyq aktsııasyn ótkizgeni anyqtaldy. Ol joly oǵan kishigirim buzaqylyq jasady degen aıyp qana taǵylǵan.
Birqatar buqaralyq aqparat quraldarynyń habarlaýynsha, Djeıms Lı Discovery telearnasy júrgizip otyrǵan saıasattyń belsendi qarsylasy bolǵan.
