Dırektor men esepshi ata-analar tólegen aqshany ózderiniń jeke shottaryna aýdaryp alǵan

ASTANA. KAZINFORM - Beıneý aýdanynyń prokýratýrasy tekseris barysynda «Kýıken» balabaqshasynda qarjylyq salasynda zań buzýshylyqtardy anyqtady. Bul týraly Mańǵystaý oblysynyń prokýratýrasynyń baspasóz qyzmeti habarlady. 

— Mekeme dırektory men esepshisi ata-analar tólegen qarajatty ózderiniń jeke shottaryna zańsyz aýdaryp, memleketke 12 mln teńgeden astam shyǵyn keltirgeni belgili boldy, — delingen habarlamada.

Atalǵan fakti boıynsha prokýrorlar Qylmystyq kodeksiniń 189-babynyń 3-bóligi boıynsha sotqa deıingi tergep-tekserýdi bastady.

Sot úkimimen dırektor kináli dep tanylyp, zańsyz ıemdengen qarajat sommasynyń 10 eselengen mólsherinde aıyppul salyndy.

Esepshi 3,5 jylǵa bas bostandyǵyn shekteý jazasyna tartyldy.

Keltirilgen zalal tolyq kólemde óteldi.

Aıta ketelik Aqtóbede jol belgilerin salýǵa jaýapty sheneýnik 8 jylǵa sottalǵan edi.