Dıplomy joq sharýalar aýyl sharýashylyǵy óndirisin júrgizý úshin jer ýchaskelerin ala almaı otyr - R. Sárpekov
ASTANA. Qyrkúıektiń 8-i. QazAqparat /Qanat Mámetqazyuly/ - Dıplomy joq sharýalar aýyl sharýashylyǵy óndirisin júrgizý úshin jer ýchaskelerin ala almaı otyr. Búgin QR Parlamenti Májilisiniń jalpy otyrysynda depýtat Ramazan Sárpekov osylaı málim etti.
«Aýyl sharýashylyǵy mınıstriniń jáne Jer resýrstaryn basqarý agenttigi tóraǵasynyń birlesken buıryǵymen aýyl sharýashylyǵy óndirisin júrgizý úshin jer ýchaskelerin jalǵa bergen kezde konkýrstardy uıymdastyrý jáne ótkizýdiń erejesi bekitilgen. Konkýrsqa paıdalanýǵa berilmegen aýyl sharýashylyǵy maqsattaryndaǵy memleket menshigindegi jer ýchaskelerin jalǵa alý quqyǵy usynylady.Sonymen birge, konkýrsqa qatysýǵa nıet bildirgen jeke tulǵanyń konkýrstyq ótiniminde qosymsha birneshe málimetter tirkelýi tıis. Sonyń mindetti bir talaby - bilimi týraly dıplomnyń kóshirmesi. Rasynda, uzaq jyldar boıy maldyń sońynda júrgen nemese aýyl sharýashylyǵymen ǵana aınalysyp kelgen kóptegen aýyl turǵyndarynda dıplom joq. Sonyń saldarynan olar aýyl sharýashylyǵy óndirisin júrgizý úshin jer ýchaskelerin jalǵa beretin konkýrstarǵa qatysa almaıtyn jaǵdaıǵa dýshar. Bir sózben aıtqanda, ne jaıylym, ne shabyndyq, ne jaılaý nemese kókónis óndiretin jer ýchaskesin alý quqyǵynan aıyrylyp otyr», dedi depýtat. Onyń aıtýynsha, «dıplomnyń kóshirmesin» talap etetin ereje normasy óreskel túrde azamattardyń quqyǵyna nuqsan keltiredi. Soǵan oraı, R. Sárpekov atalǵan normany alyp tastaý qajettigin alǵa tartady.
