Dıplomnyń bolýy biliktilik deńgeıiniń dáleli emes – mınıstr

ASTANA. QazAqparat – Búgin Májilistegi Úkimet saǵatynda QR Áleýmettik kodeksiniń jobasyn tanystyrý kezinde QR Eńbek jáne halyqty áleýmettik qorǵaý mınıstri Tamara Dúısenova jastardy jumysqa ornalastyrýdy yntalandyrý qadamdaryn aıtty, dep habarlaıdy QazAqparat tilshisi.

«Búgingi tańda dıplomnyń bolýy jumysqa qabyldaý kezinde biliktilik deńgeıiniń dáleli emes ekenin moıyndaý kerek. Sondyqtan jumys berýshilerdiń kópshiligi naqty tájirıbeniń bolýyn talap etedi. Bul jastardyń jumysqa ornalasýyna kedergi bolyp otyr. Osy oraıda ulttyq biliktilik júıesin damytý arqyly bilim berý júıesin jumys berýshilerdiń talaptarymen baılanystyratyn

«Kásiptik biliktilik týraly» zań jobasy ázirlendi. Bilim berý baǵdarlamalary jumys berýshilerdiń tehnıkalyq tapsyrmalaryna, ıaǵnı kásiptik standarttaryna sáıkes ázirlenetin bolady», - T. Dúısenova.

Onyń aıtýynsha, bul baǵytta sertıfıkattaý júıesi engiziledi. Munda azamattardyń bilimin praktıkada qoldana alý múmkindigi, belgilengen jumysty alyp kete alatyndaı biliktiligi baǵalanyp, osydan keıin sertıfıkat beriledi. Sertıfıkattar tek resmı ǵana emes, sonymen qatar resmı emes jáne ınformaldy bilimi bar adamdarǵa da beriledi.

«Osy oraıda zań qabyldanǵan soń, qyzmetkerdiń naqty biliktiligi men quzyretin rastaıtyn sertıfıkattyń bolýy jumysqa turýda artyqshylyqqa aınalady. Bul rette jumys berýshilerdi óz jumyskerlerin oqytýǵa yntalandyrý úshin memlekettik satyp alý protsesinde qazaqstandyq qamtý deńgeıin tek otandyq jumyskerlerdiń sanymen ǵana emes, olardyń ishindegi sertıfıkattalǵan jumyskerlerdiń úlesin qosa aıqyndaý usynylady», - dedi mınıstr.