«Dıplommen aýylǵa»: Qostanaı oblysynda 4 myń jas maman jumysqa ornalasty

QOSTANAI. QazAqparat – Qostanaı oblysynyń mektepterine «Dıplommen aýylǵa» baǵdarlamasy sheńberinde 4 myńǵa jýyq jas maman jumysqa alyndy. Bul týraly oblys ákimdiginde ótken apparat májilisinde Bilim basqarmasynyń basshysy Záýre Báımenova málim etti, dep habarlaıdy QazAqparat.

QR bilim berýdi jáne ǵylymdy damytýdyń 2020-2025 jyldarǵa arnalǵan memlekettik baǵdarlamasynda oqýshylar men pedagogterdiń jaǵdaıyn jaqsartýǵa basymdyq berilgen. Bul baǵytta oblysta josparly jumystar júrgizilýde. Qazirgi kezde óńirde 110 113 oqýshysy bar 494 mektep jumys isteıdi.

Osy jyly bilim berý nysandarynyń sapasyn arttyrý maqsatynda Áýlıekól aýdanynyń Amanqaraǵaı aýylynda 1,1 mlrd teńge somasyna jáne Qostanaı qalasynyń «ıÝbıleınyı» shaǵynaýdanynda 3,1 mlrd teńgege 2 zamanaýı mektep salyndy. Qarasý aýdanynyń Qarasý aýylynda 1,3 mlrd teńgege 320 orynǵa arnalǵan mekteptiń qurylysy bastaldy. Kelesi jyly Qarabalyq aýylynda da dál osyndaı mektep paıdalanýǵa beriledi.

«Qostanaı avtomobıl kóligi kolledjiniń janynan 500 oryndyq, Qostanaı joǵary medıtsınalyq kolledjinen 250 oryndyq eki jataqhananyń qurylysy bastaldy. 2021 jyly Qostanaı joǵary polıtehnıkalyq kolledjinen 500 orynǵa arnalǵan jataqhana salynady. Onyń qurylysyna 1,4 mlrd teńge jumsalady. Bilim berý obektileriniń apattylyǵyna jol bermeý úshin jyl saıyn kúrdeli jáne aǵymdaǵy jóndeýler júrgiziledi. Bıyl 133 bilim berý obektisine jóndeý jumystaryn júrgizý úshin 11,2 mlrd teńge bólindi. Bul jumys jalǵasýda. Sonymen qatar «Aýyl – el besigi» jobasy aıasynda Altynsarın orta mektebine 385 mln teńgege kúrdeli jóndeý josparlanyp otyr», - deıdi Záýre Báımenova.

Búginde óńirde muǵalimniń bedelin kóterý úshin qajetti sharalar qabyldanýda. Máselen, «Dıplommen aýylǵa» jobasy arqyly oblys mektepterine 4 myńǵa jýyq jas maman jumysqa turdy. Buǵan qosa 3,5 myń pedagogqa 463,3 mln teńgege kóterme járdemaqy tólendi.

«Ustazdarǵa úı satyp alý úshin qazyna qarjysynan 4 mlrd teńgege alyndy. Osylaısha, bir jarym myńnan astam mamanǵa nesıe berildi. 2020 jyly 280 mamanǵa áleýmettik qoldaý kórsetildi. 20 myńnan astam qostanaılyq pedagogtyń múddelerin qozǵaıtyn «Pedagog mártebesi týraly» Zańdy iske asyrý úshin oblysta 14 mlrd teńgeden astam qarajat bólindi. Zańda muǵalimderdiń quzyrettiligin arttyrýǵa baǵyttalǵan materıaldyq yntalandyrý normalary qarastyrylǵan. Mysaly, osy jyldyń 1 qańtarynan bastap pedagogtardyń ortasha jalaqysy 25% ósse, al kelesi jyldyń 1 qańtarynan bastap taǵy 25% artady. Pedagogterge tálimgerlik úshin qosymsha aqy tóleý engizildi jáne magıstr dárejesi eskeriledi. Sonymen qatar 5 myńnan astam muǵalim pedagogıkalyq sheberligi úshin qosymsha aqy alady. Mysaly «sheber» sanaty úshin laýazymdyq jalaqydan – 50%, «zertteýshi» – 40%, «sarapshy» – 35%, «moderator» 30% mólsherinde qosymsha aqy tólenedi. 2020 jyly bul maqsattarǵa 3 mlrd teńgeden astam qarajat ıgerildi», - dedi basqarma basshysy.