«Dıplommen – aýylǵa» baǵdarlamasynyń oryndalýy tómen: Senatorlar Shortandy aýdanynda boldy

ShORTANDY. QazAqparat - Parlament Senatynyń depýtattary Aqmola oblysynyń Shortandy aýdanynda bolyp, jergilikti turǵyndarmen jáne jergilikti bılik ókilderimen kezdesti, sharýa qojalyqtaryn aralap kórdi, dep habarlaıdy QazAqparat tilshisi.

Palatanyń baspasóz qyzmetinen málim etkendeı, senatorlar aýyldaǵy naqty jaǵdaı men ózekti máselelerge, sondaı-aq aýyldyq aýmaqtardy qoldaý men damytýǵa arnalǵan memlekettik baǵdarlamalardyń oryndalý sapasyna nazar aýdardy. Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń sapary 2020 jylǵy 23 qazanda ótetin parlamenttik tyńdaýǵa daıyndyq aıasynda jasalǵan.

«Senatorlarǵa kelgen aqparat boıynsha aýyl turǵyndary qalalarǵa qonys aýdarýda. Depýtattar sondaı-aq aýyl mektepteri men dárigerlik mekemelerdiń jaı-kúıine nazar aýdardy. Respýblıka boıynsha olardyń keıbiri kúrdeli jóndeýdi nemese jańa ǵımarattar salýdy qajet etedi. Aýyl turǵyndary senatorlarmen júzdesýlerde aýyldaǵy jumyspen qamtý taqyrybyn qozǵady. Sonymen qatar, sharýa qojalyqtarynyń basshylary bilikti jas mamandardyń jetispeıtinin tilge tıek etti», - delingen taratylǵan aqparatta.

«Aýylǵa joǵary bilimdi jas mamandardy tartýda kóptegen problema bar. Bizde «Dıplommen – aýylǵa« baǵdarlamasy óte jaqsy. Biraq, ókinishke oraı, bul baǵdarlamanyń oryndalý sapasy tómen», - dedi senator Aqylbek Kúrishbaev.

Parlamentshiler agrarlyq joǵary oqý oryndaryn bitirgen jas mamandardyń 100% tek 30% ǵana aýylǵa oralatynyn atap ótti. Elimizdiń kóptegen aýyldarynda osyǵan uqsas jaǵdaı qalyptasyp otyr. Biraq «Aýyl - El besigi» baǵdarlamasynyń arqasynda aýyldyq eldi mekender jandana bastady - áleýmettik nysandar qalpyna keltirilýde jáne jańa jumys oryndary ashylýda.Sondyqtan aýyl turǵyndary osy baǵdarlamanyń odan ári júzege asyrylýyna úmittenip otyr.