Dıplommen aýylǵa: Almaty oblysyna toǵyz jylda 6 myńnan asa maman kelgen
TALDYQORǴAN. QazAqparat - Almaty oblysynda 2009-2018 jyldary «Dıplommen aýylǵa» baǵdarlamasy aıasynda 6253 maman kelip, 785,3 mln teńge kóterme járdemaqy alǵan, dep habarlaıdy QazAqparat tilshisi.
«Dıplommen aýylǵa» jobasyna qatysýshylar aýyldyq jerlerde túrli salalarda eńbek etip júr. Oblystyq ekonomıka jáne bıýdjettik josparlaý basqarmasynyń málimetinshe, olardyń 4328-i - bilim salasynyń, 1487-si - densaýlyq saqtaý, 113-i - mádenıet, 40-y - sport, 49-y - áleýmettik qamsyzdandyrý jáne 236-sy - agroónerkásiptik keshen salasy mamandary.
Osy joba aıasynda turǵyn úı satyp alý nesıesi jalpy kólemi 7,7 mlrd teńge kóleminde 2912 mamanǵa berildi, sonyń 394-i 2018 jyly aldy. 2019 jyly kóterme járdemaqyny 176 750 teńge mólsherinde 742 maman, bıýdjettik nesıe 3787,5 myń teńge mólsherinde 523 maman alady dep josparlanyp otyr.
Aıta keteıik, 2009 jyldan bastap respýblıkalyq bıýdjet qarajaty esebinen «Dıplommen aýylǵa» jobasy júzege asyrylyp keledi. Aýyldyq eldi mekenderge jumys isteýge jáne turýǵa kelgen densaýlyq saqtaý, bilim berý, áleýmettik qamsyzdandyrý, mádenıet, sport jáne agroónerkásiptik keshen salasyndaǵy bir mamanǵa shaqqandaǵy kóterme járdemaqynyń kólemi 70 aılyq eseptik kórsetkishti (AEK) quraıdy.
Turǵyn úı satyp alýǵa paıyzsyz nesıeler 2010 jyldan beri 1500 AEK kóleminde beriledi. 2012 jyldan bastap áleýmettik qoldaýdyń atalǵan sharalaryn veterınarııa salasynyń mamandary da aldy.
