Dıplommen aýylǵa: Aqmolada aýylǵa baratyn muǵalimder sany artty
KÓKShETAÝ. QazAqparat - Bıylǵy oqý jyly qarsańynda Aqmola oblysynyń mektepteri men kolledjderine jumys isteýge 200-ge jýyq jas maman keldi, dep habarlaıdy QazAqparat tilshisi oblystyq ishki saıasat basqarmasynyń baspasóz qyzmetine silteme jasap.
Aqmola oblysynyń bilim basqarmasynyń málimetinshe, jyl saıyn óńirdiń bilim ordalaryna jumys isteýge 900-de astam maman keledi, onyń 400-ge jýyǵy jastar. Bıylǵy jyly joǵary bilimdi 128 muǵalim, orta tehnıkalyq jáne kásibı bilimi bar 77 maman jumysqa qabyldanyp otyr.
Basqarma basshysynyń orynbasary Valerıı Gamazovtyń sózinshe, óńirde jas mamandardy aýylǵa jumysqa tartý úshin barlyq jaǵdaı jasalýda.
«Aıta keterligi 130-dan astam jas muǵalim aýdandyq mektepter men kolledjderge jumys isteýge bardy. «Dıplommen aýylǵa!» baǵdarlamasy boıynsha sońǵy 3 jyldyń ishinde aýyldyq eldi-mekenderdegi muǵalimderdiń qatary kóbeıdi. Oblys boıynsha 800 mamanǵa úı satyp alýy úshin nesıe berildi jáne 900 muǵalim ústemaqy aldy», - dep atap ótti Valerıı Gamazov.
Aıtalyq, bıyl jyldyń 1 maýsymyndaǵy derekter boıynsha 32 nesıe berilip, 119 mamanǵa kótermeaqy tólengen.
