Dıplommen aýylǵa: 10 jylda aýylda eńbek etip júrgen 35 myń jas maman baspanaly boldy

NUR-SULTAN. QazAqparat - Aýyldy jerge jumys isteýge barǵan mamandardyń turǵyn úı satyp nemese salyp alýyna bıýdjettik nesıe berý - «Dıplommen aýylǵa» baǵdarlamasy aıasyndaǵy memlekettik qoldaý sharalarynyń biri, dep habarlaıdy QazAqparat.

Aýyl sharýashylyǵyn qarjylaı qoldaý qory «Dıplommen aýylǵa» baǵdarlamasyn iske asyrýdaǵy senimdi agent retinde qyzmet atqarady. Qor 2010 jyldan beri aýyldy jerge jumysqa barǵan 35 myńnan astam mamannyń baspanaly bolýyna nesıe berdi.

1500 AEK somasyndaǵy nesıe 0,01 %-ben 15 jylǵa beriledi. Bul baǵdarlama jas mamandar arasynda úlken suranysqa ıe.

Bıýdjettik nesıe buryn densaýlyq saqtaý, bilim berý, áleýmettik qamtamasyz etý, mádenıet, sport jáne agroónerkásip kesheni salasynyń mamandaryna ǵana berilip kelgen bolatyn.

Bıyldan bastap bul tizimge aýyl, kent, aýyldyq okrýg ákimi apparatynyń memlekettik qyzmetkerleri de kirip otyr.

Bul ózgeris QR Ekonomıka mınıstrliginiń buıryǵymen engizilip, bıyl qyrkúıek aıynan beri iske asyrylýda.

Nesıeniń qoljetimdiligin arttyrý úshin qujat jınaýdy jeńildetetin birqatar is-shara qabyldandy.

Máselen, Aýyl sharýashylyǵyn qarjylaı qoldaý qorynyń «elektrondyq úkimet» portalymen jáne memlekettik derekter bazasymen biriktirilgen ózara is-qımylynyń nátıjesinde birqatar qujat elektrondy túrde suratylatyn boldy.

Onyń ishinde jeke basyn kýálandyratyn qujat, turǵylyqty tirkelgen jeri týraly, neke týraly, jyljymaıtyn múlkiniń bolýy nemese bolmaýy jóninde jáne sońǵy jumys orny týraly málimetter bar.

Jumysqa nemese baǵdarlamaǵa qatysýǵa múddeli dıplomy bar mamandar aýdan ákimdikteriniń saıttaryndaǵy bos jumys oryndary týraly málimetterdi ala alady.

Tilektes Qosmuratova – «Dıplommen aýylǵa» jobasynyń qatysýshysy. Jaqynda ǵana baǵdarlama arqyly baspanaǵa qol jetkizdi.

Tilektes Saryaǵash aýdanynyń týmasy. 2015 jyly Shymkenttiń joǵary oqý ornyn támámdap, turmysqa shyqqan. Qazyǵurt aýdanynyń Qosaǵash aýylyna kóship barǵan ol mektepke aǵylshyn tili muǵalimi bolyp ornalasty.

Jergilikti gazetten jas mamandarǵa memleket qoldaý kórsetetinin oqyp, ákimdikke barǵan. Úsh balasy bar Tilektes «Dıplommen aýylǵa» baǵdarlamasy arqyly nesıe rásimdep, úı satyp aldy.

Muǵalimniń eńbekaqysy alǵan nesıesin tólep turýǵa jetkilikti. Kúıeýi kásipkerlikpen aınalysady. Sondyqtan, nesıeni tóleý olarǵa qıyndyq týdyrmaıdy.

«Bul óte jaqsy baǵdarlama. Ár aıdyń basynda 20 700 teńge ǵana tóleımiz. Alǵashqy tólemdi tólep te úlgerdik. Endi mobıldik qosymsha arqyly-aq tóleı salýǵa bolatynyn bildim. Bul – otbasymyz úshin óz baspanamyzǵa qol jetkizip, aıaǵymyzdan nyq turyp ketýimizge taptyrmas múmkindik boldy», - deıdi jas muǵalim.

Aýyldarǵa baryp jumys isteýge nıetti mamandarǵa nesıe berý baǵdarlamasy elimizdiń barlyq oblysynda júrip jatyr. Tolyq aqparatty jergilikti ákimdikterden bilýge bolady.

Búgingi tańda 4 524 mamanǵa turǵyn úı nesıesin rásimdegen Aýyl sharýashylyǵyn qarjylaı qoldaý qorynyń Qyzylorda fılıaly kósh bastap keledi.

4 006 mamannyń baspanaly bolýyna septigi tıgen Almaty fılıaly ekinshi orynda. 3 768 mamanǵa turǵyn úı nesıesin bergen Batys Qazaqstan fılıaly úzdik úshtikti túıindedi.