«Dıplommen aýylǵa» jobasy aıasynda jastardyń basym bóligi aýylda turaqtap jatyr - Bozymbaev

ASTANA.KAZINFORM – «Dıplommen aýylǵa» baǵdarlamasymen barǵandardyń 95 paıyzy aýyldarda qalyp jatyr. Bul týraly Premer-mınıstrdiń orynbasary Qanat Bozymbaev málim etti.

Búgin Senattyń jalpy otyrysynda depýtat Aıgúl Qapbarova atalǵan baǵdarlamany júzege asyrý kezinde júıeli problemalar baıqalǵanyn aıtty.

- Sońǵy úsh jylda baǵdarlama aıasynda 116 maman belgilengen eńbek mindettemelerin oryndamaǵan. Bul óz kezeginde memleket aldyndaǵy 784 mln teńge somasyndaǵy qarjylyq mindettemelerdiń týyndaýyna alyp keldi. Atalǵan jaǵdaıdy aýyldarǵa barmaýynyń jáne turaqtamaýynyń saldary retinde qarastyrý qajet. Buǵan turǵyn úımen qatamasyz etý deńgeıi, eńbekaqy, áleýmettik jáne ınjenerlik ınfraqurylym, sondaı-aq kadrlardy súıemeldeýdiń jetkiliksizdigi áser etedi. Baǵdarlama bastalǵan 2009 jyldan beri qansha jas maman keri qaıtty? Bul jaǵdaıǵa taldaý jasaldy ma? - dep surady A. Qapbarova.

Óz kezeginde Úkimet basshysynyń orynbasary 2009 jyldan bastap «Dıplommen aýylǵa» jobasy aıasynda 52 myń jas mamanǵa turǵyn úı alýyna 198 mlrd qarajat bólingenin aıtty.

- Onyń 1620-sy úsh jyldyq eńbekpen óteý sharttaryn oryndamaǵan nemese jalpy kólemnen 3,1 paıyzdy (15 jylda) ǵana qurady. Bul joba 15 jyldan astam merzimde júzege asyrylyp kele jatqanyn eskersek, jaqsy kórsetkish dep oılaımyn. 15 jylda - 3 paıyz deńgeıinde ǵana. Al sońǵy eki jylda bul kórsetkish - 1,4 paıyz, ıaǵnı osyndaı jaǵdaı azaıyp keledi, - dedi Q. Bozymbaev.

Onyń aıtýynsha, baǵdarlama aıasynda barǵan keıbir jastardyń turaqtamaýyna klımattyń jaqpaýy, densaýlyq jaǵdaıy, otbasyn qurýǵa baılanysty basqa aýdanǵan kóshýi nemese basqa salaǵa aýysýy sııaqty sebepter áser etken.

- Jalpy, úsh jyldyq mindettemeden keıin, jastardyń 95 paıyzy aýyldarda qalyp jatyr. Muny jaqsy nátıje dep baǵalaımyn. Úsh jyldan keıin 5 paıyzy ketip qalǵan. Eger mindettemesin oryndamaı, úsh jyldyń ishinde ketip qalsa, nesıesin tez arada jabady, - dedi Premer-Mınıstrdiń orynbasary.

Aıta keteıik, qaryz maman jumys isteıtin eldi mekende turǵyn úı satyp alýǵa nemese salýǵa beriledi. Kredıttiń eń kóp merzimi – 15 jyl. Negizgi talap – jobaǵa qatysýshy aýyldyq jerde mamandyǵy boıynsha 3 jyl jumys isteýi kerek.

Buǵan deıin senator Nurtóre Júsip «Dıplommen aýylǵa» memlekettik baǵdarlamasyna qatysýshylardyń keıbiri mindettemelerin oryndamaǵanyn aıtty.

Baǵdarlama iske asyrylǵan kezeńde 114 myńnan astam maman qoldaý alǵan, al 52 myńǵa jýyq adam turǵyn úı máselesin sheshken.