«Dıplommen – aýylǵa»: Ertis-Baıan óńirine kelgen jas mamandarǵa 9 mln teńgeden astam qarajat beriledi
PAVLODAR. KAZINFORM — Bıyl Pavlodar oblysynyń aýyldyq jerlerine eńbek etýge baratyn 167 jas mamanǵa baspana satyp alý úshin arzan nesıeler beriledi dep kútilip otyr. Bul týraly Pavlodar oblysynyń ekonomıka jáne bıýdjettik josparlaý basqarmasy basshysynyń orynbasary Damır Tólebaev habarlady.
Aýdandarǵa taban tiregen jastarǵa 100 aılyq eseptik kórsetkish mólsherinde birjolǵy kóterme járdemaqy tólenedi. Bıyl mundaı kómekti 442 azamat alady dep josparlanǵan.
«Aýdan ortalyqtaryna jumys isteýge barǵan jas mamandarǵa 2500 aılyq eseptik kórsetkishke deıin (9 mln 230 myń teńge), aýyldarǵa barǵandarǵa 2000 aılyq eseptik kórsetkishke deıin (7 mln 384 myń teńge) bıýdjettik nesıe beriledi. Eń basty talap — jastar álgi eldi mekende kemi úsh jyl jumys isteýi kerek. Qazirgi ýaqytta aýdan-qala ákimdikteri óz aýmaqtaryna qajet mamandardy tizimin túzip jatyr. Bıýdjettik nesıeler «Otbasy bank» arqyly resimdelse, al jumysty jergilikti ekonomıka bólimderi júrgizedi», - deıdi Pavlodar oblysynyń ekonomıka jáne bıýdjettik josparlaý basqarmasy basshysynyń orynbasary Damır Tólebaev.
Eske sala keteıik, Úkimet basshysy jas mamandardy jumysqa ornalastyrýǵa erekshe nazar aýdarý kerektigin tapsyrdy.
Foto: Óńirlik kommýnıkatsııalar qyzmeti
