«Dıplommen aýylǵa» baǵdarlamasyna jańa mamandyqtar qosyldy
ASTANA. KAZINFORM — Búgin Parlament Májilisiniń jalpy otyrysynda depýtattar «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańyna ózgerister men tolyqtyrýlar engizý týraly» Zańy ekinshi oqylymda qabyldady.
Májilistiń Ekonomıkalyq reforma jáne óńirlik damý komıtetiniń málimetine qaraǵanda, bul qujat jergilikti ózin-ózi basqarý júıesin quqyqtyq retteýdi jetildirýge (uǵymdyq apparatty naqtylaý; jergilikti qoǵamdastyqtyń jıyndary men jınalystaryn ótkizýge baılanysty máselelerdi retteý jáne t.b.), máslıhattar qyzmetiniń tıimdiligin arttyrýǵa, sondaı-aq máslıhat apparaty basshysyn taǵaıyndaý jáne laýazymnan bosatý tártibin, onyń ókilettikterin aıqyndaýǵa baǵyttalǵan.
Sonymen qatar bul zańda jergilikti mańyzy bar máselelerdi sheshýge azamattardyń qatysý deńgeıin arttyrý qadamdary qamtylǵan.
- Budan bólek, sýrrogat ana máseleleri eskerilgen. Sýrrogat ana qyzmetterine tapsyrys berýshiler nekedegi erli-zaıypty Qazaqstan Respýblıkasynyń azamattary ǵana bola alady, - dedi Májilis depýtaty Muqash Eskendirov.
Sonymen qatar el azamaty qatarynan eki retten artyq emes máslıhat tóraǵasy bolyp saılanýy týraly shekteý belgilendi.
- «Dıplommen aýylǵa» baǵdarlamasyna qatysatyndardyń tizbesin keńeıtý eskerilgen. Bul rette arhıv isiniń jáne tsıfrlyq tehnologııalar salasyndaǵy mamandar qosyldy, - dedi depýtat.
Eske salsaq, bıyl sáýir aıynda Parlament Májilisi osy qujatty birinshi oqylymda maquldady.
