«Dıplommen aýylǵa» baǵdarlamasyna qatysýshylardyń bir bóligi mindettemelerin oryndamaıdy — Nurtóre Júsip
ASTANA. KAZINFORM — «Dıplommen aýylǵa» memlekettik baǵdarlamasyna qatysýshylardyń keıbiri mindettemelerin oryndamaıdy. Sonyń saldarynan baǵdarlamanyń naqty tıimdiligi tómendep, bıýdjet qarajaty maqsatsyz jumsalýda. Bul máseleni búgin Senattyń jalpy otyrysynda senator Nurtóre Júsip depýtattyq saýalynda kóterdi.
Onyń atap ótýinshe, jastardy aýyldaǵy densaýlyq saqtaý, bilim berý, mádenıet, sport jáne agroónerkásip salalaryna tartý úshin qurylǵan baǵdarlama jyldar boıy túlekterge kóterme járdemaqy men turǵyn úıge arnalǵan jeńildetilgen nesıeler usynyp keledi. Baǵdarlama iske asyrylǵan kezeńde 114 myńnan astam maman qoldaý alǵan, al 52 myńǵa jýyq adam turǵyn úı máselesin sheshken. Alaıda baǵdarlama aýqymdy bolǵanymen, mańyzdy problema saqtalyp otyr: qatysýshylardyń bir bóligi aýyldyq jerde úsh jyl jumys isteý jónindegi mindettemelerin oryndamaıdy. Sońǵy úsh jyldyń ózinde 166 adam kelisim shart talaptaryn buzǵan, al bıýdjet nesıeleriniń qaıtarylmaýy 784 mln teńgeden asyp túsken.
— Memleket qarajat bólip keledi, biraq aýyldyq jerdegi kadr tapshylyǵyn sheshýde baǵdarlama tıimdi boldy ma degen suraq bar. Búginde halyqtyń 37%-y, ıaǵnı 3 mln-nan astam, 4 mln-ǵa jýyq adam aýylda turady. Tek Soltústik Qazaqstan oblysynyń ózinde 2025–2027 jyldary aralyǵynda kadr qajettiligi 3 043 adam. 114 myń maman kóterme aqy alǵanymen, tek 52 myńy ǵana turǵyn úımen qamtamasyz etilgen. Aýylda mamandardyń qanshasy sonda turaqtap qaldy, naqty kórsetkishter ashyq emes. Aqshany alady, qaltaǵa salady. Ýaqyt ótedi, aýyldan ketedi. Járdemaqylar mamandy tartýǵa kómektesedi, biraq turaqty qalýǵa jetkilikti motıvatsııa bermeıdi, — dedi Nurtóre Júsip.
Sondaı-aq, senator baǵdarlama qatysýshylarynyń ómir súrý jaǵdaıyna — jalaqy deńgeıine, áleýmettik ınfraqurylym qoljetimdiligine keshendi taldaý júrgizilmegenin aıtty. Aýyldarda áli de sapaly qyzmetter men turǵyn úı tapshy, sondyqtan jas mamandar mindetti merzim bitken soń ketip qalady. Buǵan qosa bıýrokratııa, óńirlerdegi ártúrli tájirıbe jáne oblystardyń baǵdarlamaǵa qatysýynyń birkelki emestigi qıyndyq týǵyzýda. Osyǵan baılanysty senator baǵdarlamaǵa kórsetilgen problemalardy eskere otyryp ózgerister engizýdi surady.
Aıta ketelik «Dıplommen aýylǵa» baǵdarlamasy boıynsha 3,1 myń maman baspanamen qamtamasyz etiletini týraly jazǵan edik.