«Dıplommen - aýylǵa» baǵdarlamasy aıasynda 49 myńǵa jýyq azamat turǵyn úı jaǵdaıyn jaqsartty
ASTANA. KAZINFORM –«Dıplommen - aýylǵa» baǵdarlamasynyń arqasynda 49 myńǵa jýyq azamat turǵyn úı jaǵdaıyn jaqsartty. Bul týraly Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan.
«Eldiń barlyq óńirinde, onyń ishinde shalǵaıdaǵy óńirlerde halyqtyń turǵyn úı jaǵdaılaryn jaqsartý úshin memleket birqatar tıisti sharalar qabyldaýda. Atap aıtqanda, «Dıplommen - aýylǵa» baǵdarlamasy aıasynda aýyldarda, onyń ishinde shalǵaı aýdandarda jumys isteıtin mamandar (dárigerler, pedagogtar, memlekettik qyzmetshiler, ınjenerler jáne t.b.) jyldyq 0,01 paıyzdyq mólsherlememen jeńildikti kredıt ala alady. Búgingi tańda atalǵan baǵdarlama aıasynda 49 myńǵa jýyq azamat ózderiniń turǵyn úı jaǵdaılaryn jaqsartty», - dedi Roman Sklıar jaýabynda.
Budan basqa, onyń dereginshe, «Otbasy bank» AQ jergilikti atqarýshy organdarmen birlesip, 2017 jyldan bastap jeńildetilgen ıpotekalyq kredıtteýdiń óńirlik baǵdarlamalaryn iske asyryp jatyr. Olar boıynsha búgingi kúni 9,8 myńǵa jýyq azamat jeke turǵyn úı satyp aldy.
Sondaı-aq «Otbasy bank» AQ aýyldyq jerlerdiń jáne aýdan ortalyǵy turǵyndaryn turǵyn úımen qamtamasyz etý maqsatynda osy jyldyń maýsym aıynan bastap, «Asyl meken» baǵdarlamasyn iske qosty. Onyń aıasynda salymshylar bastapqy jarnasy 10 paıyz bolatyn jyldyq 5 paıyzdyq jeńildetilgen ıpoteka ala alady. Baǵdarlama iske qosylǵan sátten bastap bank salymshylaryna 1,3 mlrd teńgege nesıe berildi.
«Otaý» jáne «Naýryz» baǵdarlamalary aıasynda aýyldarda jáne aýdan ortalyqtarynda turǵyn úı satyp alatyn azamattarǵa salynyp jatqan turǵyn úı bolmaǵan jaǵdaıda ekinshi naryqta turǵyn úı satyp alý múmkindigi beriletinin atap ótý qajet. Sonymen qatar bank júıe quraýshy kásiporyndarmen birlesip óńirlerde olardyń qyzmetkerlerin turǵyn úı boıynsha qoldaý kórsetýge baǵyttalǵan óńirlik korporatıvtik baǵdarlamalardy iske asyrýda», - dedi birinshi vıtse-premer.
Buǵan deıin Premer-Mınıstrdiń birinshi orynbasary Májilis depýtattarynyń «Naýryz» ıpotekalyq baǵdarlamasynyń bastapqy jarna mólsherin tómendetýge qatysty saýalyna jaýap bergenin jazǵan edik.
