Dıplomattardyń otbasy múshelerine Shveıtsarııada jumys isteýge múmkindik beretin qujat maquldandy

ASTANA. QazAqparat – Májilistiń jalpy otyrysynda «Qazaqstan Respýblıkasynyń Úkimeti men Shveıtsarııa Federaldyq Keńesi arasyndaǵy dıplomatııalyq ókildikter, halyqaralyq uıymdar janyndaǵy turaqty ókildikter jáne konsýldyq mekemeler qyzmetkerleriniń otbasy músheleriniń aqyly eńbek qyzmeti týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«Zań jobasynyń maqsaty – osy kelisimniń kúshine enýi úshin memleketishilik rásimderdi júrgizý. Bul qujatty ratıfıkatsııalaý Qazaqstanǵa jáne Shveıtsarııaǵa óz dıplomatııalyq ókildikterindegi, halyqaralyq uıymdar janyndaǵy turaqty ókildikterindegi, sondaı-aq konsýldyq mekemelerindegi qyzmetkerleriniń otbasy múshelerine eki memleket aýmaǵynda aqyly eńbek qyzmetin júzege asyrýyna qatysty máselelerdi ózara negizde sheshýge múmkindik beredi. Qazirgi ýaqytta Shveıtsarııa Qazaqstannyń Eýropadaǵy negizgi saıası, saýda-ekonomıkalyq seriktestiriniń biri bolyp otyr», - dedi QR Syrtqy ister mınıstriniń orynbasary Roman Vasılenko.

Osy oraıda ol kelisimdi ratıfıkatsııalaý elder arasyndaǵy dostyq qarym-qatynastardy odan ári damytýǵa oń áserin tıgizetinin aıtty. Qujat aıasynda óz elderiniń dıplomatııalyq qyzmetinde jumys isteý úshin shetelge joldanatyn Qazaqstan men Shveıtsarııanyń dıplomatııalyq qyzmetteri personalynyń otbasy múshelerine qolaıly jaǵdaı jasalmaq.

«Shart Qazaqstannyń zańnamasyna, elimiz ratıfıkatsııalaǵan halyqaralyq sharttarǵa, memleketimiz múshe bolyp sanalatyn halyqaralyq uıymdardyń sheshimderine qaıshy kelmeıdi», - dedi Syrtqy ister mınıstriniń orynbasary.