Dıplomattar men bıznesmender 2016 jylǵa arnalǵan birikken jumys josparyn aıqyndady
ASTANA. QazAqparat - Búgin Astanada Qazaqstandaǵy shet memleketterdiń elshileri men otandyq iri kásipkerlerdiń qatysýymen «Dıplomatııalyq bıznes klýbtyń» úılestirýshilik keńesiniń ekinshi otyrysy ótti. Jıynda Klýbtyń erejesi men 2016 jylǵa arnalǵan dıplomattar men bıznesmenderdiń birikken is-sharalar jospary bekitildi.
Klýb josparyna saı, bıylǵy naýryz aıynyń sońynda dıplomatııalyq korpýs úshin Aqtóbe oblysynyń ınvestıtsııalyq múmkindikteriniń tanystyrylymy ótedi, sondaı-aq shet memleketterdiń elshileri men kásipkerleri Soltústik Qazaqstan jáne Ońtústik Qazaqstan oblystaryna birikken saparlaryn uıymdastyrý kózdelgen.
Munyń aldynda 2016 jylǵy 5 aqpan kúni «Dıplomatııalyq bıznes klýbtyń» aıasynda Soltústik Qazaqstan oblysynyń ákimi Erik Sultanovtyń Qazaqstan respýblıkasynda akkredıtatsııalanǵan dıplomatııalyq ókildikterdiń basshylarymen kezdesýi ótkizildi.
Bul kezdesýler men saparlardyń maqsaty - sheteldik dıplomattardy Qazaqstannyń aımaqtarynyń ınvestıtsııalyq áleýetimen, túrli ekonomıkalyq, óndiris, áleýmettik salalardaǵy ınvestıtsııalyq jobalarmen tanystyrý, QR naryǵyna ınvestorlardyń kirýine qoldaý kórsetý, qazaqstandyq kásipkerlerge sheteldik áriptesterdi tabýǵa qol ushyn sozý, otandyq kompanııalardyń taýarlary men qyzmetteriniń sheteldik naryqqa jol tartýyna kómek kórsetý bolyp tabylady.
Buǵan deıin óńirlerdiń tanystyrylymdaryn ótkizýge jáne Qazaqstannyń oblystaryna saparlardy uıymdastyrý boıynsha elshilerdiń tarapynan birneshe usynystar aıtylyp, «Dıplomatııalyq bıznes klýbtyń» suhbattyq alańy arqyly mundaı múmkindik júzege asatyn boldy.
Elbasy Nursultan Nazarbaev Qazaqstannyń aımaqtarynyń damýy negizi retinde otandyq jáne sheteldik kásipkerlerdiń qatysýymen ınvestıtsııalyq jobalardyń júzege asýy birneshe ret aıtqan bolatyn.
«100 naqty qadam» Ult josparynda óńdeýshi óndiriske strategııalyq ınvestorlardy tartyp, ekonomıkanyń basymdyq berilgen salalarynda birikken kásiporyndardy qurý, Qazaqstannyń taýarlarynyń álemdik naryqqa shyǵarý úshin transulttyq korporatsııalardy tartý maqsattary belgilengen.
Sonymen qatar, kúzde «Dıplomatııalyq bıznes klýb» músheleri Young Presidents' Organization (YPO) uıymynyń uıymdastyrýymen ótetin «K5: Kazakhstan Growth Forum» platformasyna belsendi túrde qatysady. Klýb aıasynda resmı jıyndarmen qosa, beıresmı is-sharalar da josparlanǵan. Elshiler men bıznesmender golftan «Ambassador's Cup» týrnırine, konkýr men salt júristen ótetin jarysqa qatysýdy josparlap otyr. Munymen qosa, klýb músheleri jyl saıynǵy «Charity Bazaar» qaıyrymdylyq jármeńkesiniń ótkizilýine qoldaý kórsetetin bolady.
Aıta keteıik, «Dıplomatııalyq bıznes klýb» - 2015 jylǵy 2 shilde kúni QR Syrtqy ister mınıstri Erlan Ydyrysovtyń bastamasymen dıplomatııalyq korpýs pen qazaqstandyq kásipkerler arasyndaǵy ózara is-qımyl men qarym-qatynastardy nyǵaıtatyn beıresmı qurylym retinde qurylyp, QR «Atameken» Ulttyq kásipkerler palatasynyń Tóralqa tóraǵasy Tımýr Qulybaev bastaǵan bıznes-qaýymdastyq tarapynan qoldaý tapqan edi.
