Dıplomatııalyq poshtany jınaqtaý men jetkizýdi qamtamasyz etý jónindegi fýnktsııalar bekitiledi - mınıstr
NUR-SULTAN. QazAqparat – Búgin Parlament Májilisiniń jalpy otyrysynda Syrtqy ister mınıstri Muhtar Tileýberdi «dıplomatııalyq poshta» uǵymyna qatysty túsinik berdi, dep habarlaıdy QazAqparat tilshisi.
Aıta keteıik, jalpy otyrysta «Qazaqstan Respýblıkasynyń dıplomatııalyq qyzmeti týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasy maquldandy.
Zań jobasy qazaqstandyq dıplomattardyń áleýmettik qorǵalýyn arttyrýǵa jáne dıplomatııalyq qyzmet organdarynyń qyzmetin jetildirýge baǵyttalǵan.
«Dıplomatııalyq poshta» uǵymyn engizip, Qazaqstan Respýblıkasy Úkimetiniń, Syrtqy ister mınıstrliginiń jáne basqa da memlekettik organdarynyń dıplomatııalyq poshtany jınaqtaý, resimdeý jáne jetkizýdi qamtamasyz etý jónindegi fýnktsııalaryn bekitý usynylady», - dedi Syrtqy ister mınıstri Muhtar Tileýberdi.
Onyń aıtýynsha, shet elderdegi mekemeler jumysynyń ereksheligin eskere otyryp, olardyń sharýashylyq qyzmeti men qarjylyq tártibine baılanysty máselelerdi júıege keltirýge qatysty ózgerister qarastyrylǵan.
