Dıplomatııalyq qyzmet týraly zańǵa engizilgen ózgerister maquldandy
ASTANA. 24 qarasha. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «Qazaqstan Respýblıkasynyń dıplomatııalyq qyzmeti týraly» zańyna ózgerister men tolyqtyrýlar engizý týraly» zań jobasyn maquldandy.
Atalǵan zań jobasynyń maqsaty dıplomatııalyq qyzmet personaly men olardyń otbasy múshelerin materıaldyq qamtamasyz etý jáne áleýmettik qorǵaý maqsatynda ázirlengen. Bul rette dıplomatııalyq qyzmet ardagerlerine medıtsınalyq qyzmet kórsetý jáne olardy zeınetaqymen qamsyzdandyrý deńgeıin arttyrý sharalary jáne basqa da áleýmettik baǵyttar qamtylyp otyr. Sondaı-aq zań jobasymen dıplomatııalyq qyzmet organdarynyń qyzmetin uıymdastyrý bóligine ony jaqsartýdy kózdeıtin birqatar túzetýler engizilgen.
Jumys tobynyń otyrystary barysynda Úkimet tarapynan zań jobasyna qatysty depýtattar usynǵan birqatar normalarǵa qoldaý bildirilgen. Atap aıtqanda, QR dıplomattyq jáne qyzmettik pasportyn paıdalanýǵa, Syrtqy ister mınıstrliginde jáne QR sheteldegi mekemelerinde qyzmetke taǵaıyndaý jáne bosatý quzyretin shekteýge, joǵary dıplomattyq dáreje berýge, dıplomatııalyq qyzmettiń qyzmetkerleri nemese jumyskeri shetelde qaıtys bolǵan (qaza tapqan) jaǵdaıda birjolǵy járdemaqy belgileýge qatysty normalarǵa qoldaý bildirildi.
Zań jobasyna Májilis depýtattary bastamashylyq jasaǵan bolatyn. Májilis maquldaǵan zań jobasy Parlament Senatyna jiberiledi.
