Dıplomatııalyq qyzmet ardagerleriniń zeınetaqysyn kóterý kerek - B. Áıtimova
ASTANA. QazAqparat - Dıplomatııalyq qyzmet ardagerleriniń zeınetaqysyn arttyrý kerek. Búgin Senattyń jalpy otyrysynda senator Birǵanym Áıtimova osy máseleni kóterdi.
Depýtattyń aıtýynsha, qazirgi tańda Qazaqstandaǵy dıplomatııalyq qyzmet ardagerleriniń bazalyq zeınetaqy mólsheri olardyń laıyqty ómir sapasyn qamtamasyz ete almaıdy. «Osyǵan oraı, otandyq dıplomatııa qyzmetin damytý jáne qazaqstandyq dıplomatııa ókilderin áleýmettik qorǵaý úshin osy sanattaǵy tulǵalarǵa zeınetaqy mólsherin arttyrýdy qaıta qarastyryp, olarǵa qatysty zeınetaqy tólemderi men esepteý tásilderin ózgertý kerek», - dedi Birǵanym Áıtimova.
Onyń aıtýynsha, álemniń jetekshi elderiniń basym bóliginde dıplomattardyń zeınetaqymen qamtamasyz etilýi erekshe tártip boıynsha qarastyrylady. Bul rette kóptegen memleketterde dıplomattar aı saıynǵa zeınetaqy tólemine qosymsha 1 myń 500 dollar alyp otyrady. Al Qazaqstanda dıplomat zeınetkerlerdiń zeınetaqylary tómen ári bul erteńgi kúnge degen senimsizdik týdyrady.
«Budan bólek, dıplomatııalyq qyzmet ókilderi úshin keıde shet elderde 2-3 jylǵa deıin bolýǵa týra keledi. Onda olar otbasymen, jubaıymen birge barady. Alaıda, bizdiń elimizde osyndaı uzaqmerzimdi is-saparlar zeınetaqy júıesine qatysýdyń ótiline esepke alynbaıdy. Bul da qaıta qaraýdy qajet etetin másele», - dedi B. Áıtimova.
