Dıplomatııalyq korpýstyń kóship kelýi bizdiń jańa elordamyzdy halyqaralyq tanýdyń ujymdyq aktisi boldy - N.Nazarbaev
ASTANA. 6 shilde. QazAqparat - Dıplomatııalyq korpýstyń kóship kelýi bizdiń jańa elordamyzdy halyqaralyq tanýdyń ujymdyq aktisi boldy,
dep jazdy QR Prezıdenti Nursultan Nazarbaev búgin baspasózde jaryq kórgen «Astana - Qazaqstannyń uly dáýiri jáne strategııalyq vektory» degen taqyryptaǵy maqalasynda.
Elbasy óz maqalasynda sheteldik dıplomattardy alǵash ret Almatydan Astanaǵa kóshýge shaqyrǵan kezinde olardyń kópshiliginiń júzderinen tańyrqaýshylyq pen abyrjýshylyq ańǵarylǵanyn esine alyp, olar sol kezde burynǵy astanaǵa endi ǵana boı úıretip, ornalasa bastaǵandyǵyn atap ótedi.
«Shetel dıplomattary úshin biz tutastaı elshilik qalashyǵyn turǵyzdyq jáne birqatar elder soǵan ózderiniń dıplomatııalyq mıssııalaryn qaıta ornalastyrdy. Betburysty kezeń bizdiń jetekshi strategııalyq áriptesterimiz - Reseı, AQSh, Qytaı, sodan keıin Túrkııa elshilikteriniń ǵımarattar kesheni salynyp, «ıleýden» ótkennen keıin baryp týdy», - dedi QR Prezıdenti.
Memleket basshysynyń jazýynsha, búginde kóptegen shetel elshilikteri Astanada oryn teýip, óz elderiniń Qazaqstanmen ekijaqty qarym-qatynastaryn nyǵaıtý jáne keńeıtý boıynsha jemisti jumys júrgizýde.
«Dıplomatııalyq korpýstyń kóship kelýi bizdiń jańa elordamyzdy halyqaralyq tanýdyń ujymdyq aktisi boldy. Men shetel dıplomattaryna Astanadaǵy ózderiniń qyzmetterimen elordaǵa erekshe reńk berip, qaıtalanbas elordalyq mentalıtetti nyǵaıtýǵa orasan úles qosyp otyrǵandary úshin rızamyn. Osynyń barlyǵy Astananyń tanymaldyǵy ulttyq shekaradan asyp, ony zamanaýı álemdegi «astanalar klýbyna» laıyqty qatysýshy etkenin bildiredi»,- dedi N.Nazarbaev.
