Dıplomatııalyq bıznes klýb Úılestirýshilik keńesiniń alǵashqy otyrysy ótti
ASTANA. QazAqparat - Astanada Qazaqstandaǵy shet memleketterdiń elshileriniń, otandyq iri kásipkerlerdiń qatysýymen Dıplomatııalyq bıznes klýbtyń Úılestirýshilik keńesiniń alǵashqy otyrysy ótti. Jıynda Klýbtyń erejesi, negizgi maqsattary men mindetteri, sondaı-aq 2016 jylǵa arnalǵan dıplomattar men bıznesmenderdiń birikken is-sharalar jospary anyqtaldy.
Dıplomatııalyq bıznes klýbty qurý bastamasyn QR Syrtqy ister mınıstri Erlan Ydyrysov kótergen bolatyn. 2015 jyldyń 2 shildede, Qazaqstannyń Dıplomatııalyq kúnin merekeleý kezinde, bul bastama dıplomatııalyq korpýs pen qazaqstandyq kásipkerler arasyndaǵy ózara is-qımyl men qarym-qatynastardy nyǵaıtatyn beıresmı qurylym maqsatymen QR «Atameken» Ulttyq kásipkerler palatasynyń Tóralqa tóraǵasy Tımýr Kýlıbaev bastaǵan bıznes-qaýymdastyq tarapynan qoldaý tapqan edi.
Klýbtyń Úılestirýshilik keńesiniń otyrysynda dıplomattar men bıznesmender QR Prezıdenti N.Nazarbaevtyń Qazaqstan halqyna Joldaýynda aıtqan jańa ınvestıtsııalyq saıasat negizderin, memlekettiń ınvestıtsııalyq ahýaldy jetildirýge jáne jaqsartýǵa baǵyttalǵan reformalardy júzege asyrý nıetin, sheteldik ınvestorlardy tartý úshin qosymsha yntalandyrý jumystaryn júrgizýdi pozıtıvtik túrde qabyldaǵandaryn atap ótti.
Sonymen qatar, Dıplomatııalyq bıznes klýbtyń QR Ulttyq kásipkerler palatasymen, Young Presidents' Organization (YPO) jáne de basqa da bıznes uıymdarymen ózara qarym-qatynas máseleleri talqylandy. Keńeske qatysýshylar QR naryǵyna ınvestorlardyń kirýine qoldaý kórsetýge, qazaqstandyq kásipkerlerge sheteldik áriptesterdi tabýǵa qolushyn sozýǵa, otandyq kompanııalardyń taýarlary men qyzmetteriniń sheteldik naryqqa jol tartýyna kómek kórsetý qajettiligine nazar aýdardy. Sondaı-aq, dıplomattar men bıznesmender 2016 jyldyń aldyn-ala jumys josparyn talqylap, resmı kezdesýler, forýmdar, dóńgelek ústelder, jáne beıresmı sharalar, golftan, tennıs pen basqa da sport túrlerinen jarystar ótkizýge ýaǵdalasty. Dıplomatııalyq bıznes klýb Óńirlik kásipkerler keńesteri men Óńirlik kásipkerler palatasynyń múmkindikterin paıdalana otyryp, sheteldik elshilerdiń Qazaqstan aımaqtarymen jete tanysýyn uıymdastyrýǵa qoldaý kórsetetin bolady.
Dıplomattar men kásipkerler dıplomatııalyq bıznes klýbtyń mańyzdylyǵyn atap ótip, keleshekte de klýbtyń jumysy múmkindiginshe barlyq taraptarǵa tıimdi bolýyna kúsh-jigerin jumsamaq.
