Dıplomatııalyq kelissózder júrip jatqanda AQSh Iranǵa taǵy soqqy jasady
ASTANA. KAZINFORM – AQSh áskerı kúshteri Irannyń ońtústigindegi áýe shabýylyna qarsy qorǵanys nysandaryna kezekti áýe soqqylaryn jasady. Bul rette Vashıngton men Doha qaqtyǵysty retteý jónindegi dıplomatııalyq kelissózder jalǵasyp jatqanyn málimdedi, dep habarlaıdy Euronews.
Basylymnyń málimetinshe, soqqylar 6 qarasha kúni keshke Keshm aralyndaǵy Irannyń áýe shabýylyna qarsy qorǵanys júıelerine baǵyttalǵan. AQSh prezıdenti Donald Tramp áskerı operatsııany aýqymy jaǵynan shaǵyn dep atap, amerıkalyq áskerılerge zenıttik qondyrǵyny joıý úshin birneshe mınýt qana qajet bolǵanyn málimdedi.
Sonymen qatar Aq úı basshysy AQSh-tyń Katardyń araaǵaıyndyǵymen Iranmen júrgizip jatqan kelissózderde aıtarlyqtaı ilgerileýge qol jetkizgenin aıtty.
– Qazir biz olarmen jumys istep jatyrmyz. Olar kelisim jasaǵysy keledi, – dedi Tramp.
Irannyń memlekettik buqaralyq aqparat quraldary Keshm aralyndaǵy Sýz aýdanynda eki zymyrannyń jarylǵanyn habarlady. Qıraý aýqymy men zardap shekkender týraly aqparat jarııalanǵan joq.
Buǵan deıin Islam revolıýtsııasy saqshylary korpýsy Irannyń ońtústiginde amerıkalyq áskerı ushqyshsyz ushý apparatyn joıǵanyn málimdegen edi. Vashıngton bul aqparatty rastaǵan joq.
Áskerı shıeleniske qaramastan, Katar araaǵaıyndyq áreketterin jalǵastyryp jatyr. Euronews málimetinshe, Tegeran Irannyń ıadrolyq baǵdarlamasyna qatysty AQSh-pen kelispeýshilikterdi retteý jónindegi Dohanyń jańa usynystaryn qarastyryp jatyr.
Irannyń talaptary qatarynda AQSh-tyń porttardy qorshaýyn toqtatý, sanktsııalardy alyp tastaý, buǵattalǵan aktıvterdi bosatý jáne óńirdegi áskerı áreketterdi toqtatý bar.
Sonymen qatar 6 qarashada Donald Tramp Katar ámiri sheıh Tamım bın Hamad Ál Tanımen telefon arqyly sóılesti. Taraptar shıelenisti báseńdetý jáne kelisimge qol jetkizý jónindegi dıplomatııalyq kúsh-jigerdi talqylady.
Buǵan deıin Katar AQSh pen Iran arasyndaǵy kelissózderdiń sátsiz aıaqtalǵany týraly aqparatty joqqa shyǵarǵan edi. Doha araaǵaıyndar dıplomatııalyq jolmen sheshimge qol jetkizý úshin Vashıngton jáne Tegeranmen is-qımyldy úılestirýdi jalǵastyryp jatqanyn atap ótti.
