Dıplomatııalyq bıznes klýbta Qazaqstannyń ınvestıtsııalyq múmkindikteri talqylandy
Astanada Dıplomatııalyq bıznes klýb músheleriniń otyrysy ótip, onda sheteldik dıplomattar men bıznes-qaýymdastyq ókilderi Qazaqstannyń ınvestıtsııalyq múmkindikterimen, sondaı-aq Astanada ótetin 5-shi Dúnıejúzilik kóshpendiler oıyndarynyń barysymen tanysty, dep habarlaıdy Kazinform.
Dıplomatııalyq bıznes klýb otyrysyna Senat tóraǵasy Máýlen Áshimbaev, Dıplomatııalyq bıznes klýbtyń teń tóraǵasy Islambek Saljanov, Syrtqy ister mınıstriniń orynbasary Álibek Baqaev, «Atameken» QR UKP tóralqa tóraǵasy Raıymbek Batalov, YPO Kazakhstan tóraǵasy Qanat Kópbaev, Qazaqstanda tirkelgen dıplomatııalyq ókildikterdiń basshylary jáne Qazaqstannyń bıznes-qaýymdastyq jetekshileri qatysty.
Klýb músheleri aldynda sóılegen sózinde Máýlen Áshimbaev Memleket basshysy Qasym-Jomart Toqaevtyń bastamasymen eldi jańǵyrtý baǵytynda keshendi reforma júzege asyrylyp jatqanyn atap ótti.
Búgingi kúnniń basty mindetteriniń biri — el damýynyń jańa ekonomıkalyq modelin qalyptastyrý.
«Qazaqstan búginde ashyqtyq qaǵıdattaryn ustanady. Sondaı-aq ekonomıkalyq, saıası, mádenı-gýmanıtarlyq jáne basqa da salalarda ózge eldermen jan-jaqty yntymaqtastyqty belsendi damytyp keledi. Dıplomatııalyq bıznes klýby osy baǵyttaǵy mindetterdi iske asyrýǵa óz úlesin qosady dep senemin», — dedi Senat tóraǵasy.
Óz kezeginde Islambek Saljanov 8 jyl ishinde klýbtyń sheteldik dıplomatııalyq korpýs pen Qazaqstannyń túrli salalardaǵy iskerlik qoǵamdastyǵy arasyndaǵy ózara is-qımyldy damytý jáne nyǵaıtý úshin tolyqqandy beıresmı alańǵa aınalǵanyn atap ótti.
«Memleket basshysynyń saıası júıeni qaıta jańǵyrtý jáne áleýmettik-ekonomıkalyq jańǵyrtý boıynsha júrgizgen reformalarynyń arqasynda Qazaqstanda bıznesti júrgizý úshin teń múmkindikter paıda boldy. Qazaqstan ekonomıkasyn naqty monopolııasyzdandyrý júrip jatyr. Sybaılas jemqorlyqqa qarsy kúresti kúsheıtý, zań ústemdigi men ádil sot tóreligin ornatý Qazaqstanǵa sheteldik ınvestorlardy tartý úshin qolaıly jańa múmkindikter týǵyzady», — dep atap ótti Islambek Saljanov.
«Atameken» QR UKP tóralqa tóraǵasy Raıymbek Batalov óz sózinde Dıplomatııalyq bıznes klýb sheteldik ınvestorlarǵa Qazaqstanda senimdi seriktester tabýǵa múmkindik beretinin, bul klýbtyń negizgi baǵyttarynyń biri ekenin atap ótti.
YPO Kazakhstan tóraǵasy Qanat Kópbaevtyń aıtýynsha, YPO músheleri DBK qurylǵan kúnnen bastap belsendi túrde birge jumys istep keledi.
Onyń aıtýynsha, yntymaqtastyqtyń artyqshylyǵy — elder arasyndaǵy ózara tıimdi uzaqmerzimdi iskerlik qarym-qatynas qurý jáne bul jerde Dıplomatııalyq iskerlik klýb basty ról atqarady.
Kezdesý barysynda Dıplomatııalyq bıznes klýbtyń atqarýshy dırektory Saıajan Tuıaqova klýbtyń 2024 jylǵa arnalǵan aldaǵy is-sharalary týraly aıtty.
Olardyń qatarynda Qazaqstannyń óńirlerine dıplomatııalyq ókildikter basshylarynyń iskerlik týrlary, dıplomattar úshin bıznes-qoǵamdastyq jetekshilerimen iskerlik tańǵy as, salalyq mınıstrlikterdiń basshylarymen kezdesýler, ınvestıtsııalyq ahýal boıynsha túrli lektsııalar men semınarlar ótkizý jáne basqa da is-sharalar bar.
Sondaı-aq, Dıplomatııalyq iskerlik klýb múshelerine aldaǵy qyrkúıekte Astanada ótetin 5-shi Dúnıejúzilik kóshpendiler oıyndary tanystyryldy. Islambek Saljanov Ulttyq sport túrleri qaýymdastyǵynyń prezıdenti bola otyryp, DBK-nyń barlyq múshelerin ulttyq sport túrleri jarystaryna qatysýǵa shaqyrdy.
Dıplomatııalyq bıznes klýb 015 jylǵy 2 shildede QR Syrtqy ister mınıstrligi men «Atameken» UKP bastamasymen quryldy.
Klýb músheleri Qazaqstanda tirkelgen shet memleket dıplomatııalyq ókildikteriniń basshylary, Qazaqstan Respýblıkasynyń bıznes-qoǵamdastyqtarynyń jetekshileri, halyqaralyq uıymdardyń, memlekettik organdardyń, ulttyq kompanııalardyń basshylary, YPO Kazakhstan Integrated músheleri jáne t. b.
DBK óz múshelerine olardyń ınvestıtsııalyq múmkindikterin tanystyrý úshin Qazaqstannyń óńirlerine bıznes-forýmdar, konferentsııalar, dıplomatııalyq korpýstyń tanysý saparlaryn uıymdastyrady, sondaı-aq Qazaqstannyń salalyq mınıstrlikteri men vedomstvolarynyń basshylyǵymen kezdesýler, beıresmı is-sharalar, sonyń ishinde sporttyq, qaıyrymdylyq, otbasylyq sharalaryn ótkizedi.
