Dıplomatııa qyzmetiniń ardagerlerine qurmet kórsetildi
ASTANA. 11 shilde. QazAqparat - Qazaqstan Respýblıkasynyń Syrtqy ister mınıstri Erjan Qazyhanov Almatyda elimizdiń dıplomatııalyq qyzmetiniń ardagerlerimen kezdesti, dep habarlady QR Syrtqy ister mınıstrliginiń baspasóz qyzmeti.
Qazaqstandyq syrtqy saıasat vedomstvosynyń basshysy óz sózinde, ardagerlerdi kásibı merekesimen quttyqtaı otyryp, Dıplomatııalyq qyzmet kúniniń Qazaqstan Respýblıkasynyń kásibı merekeler tizimine qosylǵany Memleket basshysynyń Syrtqy ister mınıstrligi qyzmetkerleriniń bizdiń elimizdiń táýelsizdigin nyǵaıtýǵa, syrtqy saıası baǵytymyzdy júzege asyrýǵa, Qazaqstan azamattarynyń ál-aýqatyn artyrýǵa qosqan úlesin joǵary baǵalaǵanynyń aıqyn dáleli dep atap ótti.
«Prezıdent N.Nazarbaevtyń tikeleı basshylyǵymen otandyq syrtqy saıasat qyzmeti ózara tıimdi yntymaqtastyq pen syndarlylyq prıntsıpine negizinde jaqyn kórshilermen, álemdik derjavalarmen, sonymen qatar kópjaqty formattaǵy qarym-qatynastarda ornyqty júıe qurdy», - dep atap ótti mınıstr.
E.Qazyhanov Qazaqstannyń EQYU, ShYU jáne IYU uıymdaryna tóraǵalyq etýi syrtqy saıasat salasyndaǵy strategııalyq qyzmetiniń durystyǵyn jáne jemistiliginiń nátıjesi ekenin atap kórsete otyryp, Astananyń jáne Qazaqstannyń halyqaralyq arenadaǵy bedeli arta túskenin atap kórsetti.
Osy oraıda SІM basshysy «dıplomatııalyq qyzmet ardagerleriniń biliktiligi men baǵasyz tájirıbesi bizdiń ınstıtýtsıonaldyq damýymyzdyń negizine aınaldy», - dep erekshe atap ótti.
Saltanatty is-shara barysynda syrtqy ister mınıstri dıplomatııalyq qyzmet ardagerlerine nagradalardy tabys etip, zor densaýlyq pen ıgilik tiledi.
Kezdesýge Akmaral Arystanbekova, Saılaý Batyrshauly, Vıacheslav Ǵızzatov, Tileýhan Qabdyrahmanov, Ýálıhan Qońyrbaev jáne basqa da belgili dıplomattar qatysty.
