Dıplomat: Germanııa kompanııalary Qazaqstanda qoqys jaǵatyn zaýyttar salýǵa múddeli

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev Germanııa Federatıvtik Respýblıkasynyń Qazaqstandaǵy Elshisi Tıl Klınnermen kezdesti, dep habarlaıdy QazAqparat.

Mınıstrliktiń saıtyndaǵy aqparatta aıtylǵandaı, Maǵzum Myrzaǵalıev geologııa salasyndaǵy Qazaqstan-Germanııa yntymaqtastyǵyn nyǵaıtýǵa daıyn ekenin bildirdi.

«Búginde ulttyq derekter banki men mıneraldyq resýrstardyń aqparattyq júıesi ázirlenýde. Bul jer sharynyń kez kelgen núktesinen onlaın-rejımde barlyq qupııa emes, onyń ishinde lıtıı jáne oǵan ilespe elementterge baı ken oryndary boıynsha geologııalyq derekterge qol jetkizýge múmkindik beredi. Sondaı-aq, ınvestorlarǵa biryńǵaı terezede «birinshi ótinim» qaǵıdaty boıynsha lıtsenzııalar berý múmkin bolady. Jańa engizilimderdi eskere otyryp, biz germanııalyq kompanııalarmen geologııa salasyndaǵy yntymaqtastyqqa ashyqpyz», - dedi mınıstr.

Vedomstvo basshysy parnıktik gaz shyǵaryndylaryna kvotalar saýdasynyń qazaqstandyq júıesin eýropalyq júıemen jaqyndastyrý boıynsha jumys tobyn qurý bastamasyn qoldap, Germanııa tarapynyń osy jumys tobyna tóraǵasy retinde qatysqany úshin alǵys bildirdi.

«Biz Qazaqstannyń 2050 jylǵa deıingi tómen kómirtekti damý tujyrymdamasyn ázirlep jatyrmyz», - dedi Maǵzum Myrzaǵalıev.

Elshi men mınıstr jańa Ekologııalyq kodekske qatysty da pikir almasty.

Tıl Klınner qaldyqtardy kádege jaratý salasyndaǵy yntymaqtastyqty damytýdyń keleshegi zor ekenin, Germanııa kompanııalarynyń Qazaqstanda qoqys jaǵatyn zaýyttar salýǵa múddeli ekenin atap ótti.