Dıplomat, ǵalym, sazger - úsh almatylyq qalanyń qurmetti azamaty atandy
Almaty ákiminiń orynbasary Arman Qyryqbaevtyń aıtýynsha, qalalyq komıssııa sheshimimen 3 úmitker - Aqmaral Arystanbekova, Serik Qırabaev jáne Eskendir Hasanǵalıev tańdap alynǵan.
Almaty máslıhatynyń áleýmettik mádenıetti damytý boıynsha turaqty komıssııa múshesi Damır Shynybekov tańdaýlylardyń ǵylym men mádenıetke, dıplomatııaǵa qosqan úlesi ólsheýsiz ekenin aıtty. Máslıhat depýtattary da bul úshtiktiń qalanyń qurmetti azamaty atanǵandaryn qoldap, sheshimdi bir aýyzdan maquldaǵan.
Aqmaral Haıdarqyzy Arystanbekova 1948 jyly týǵan. Ol 1989-1991 jj. burynǵy QazKSR syrtqy ister mınıstri bolǵan. Qazaqstandaǵy alǵashqy áıel elshi 1996-2003 jyldary Frantsııada jáne Kýbada elshi bolyp qyzmet atqarǵan.
Qazaqstannyń BUU-daǵy birinshi turaqty ókili. Bul qyzmetin 1992 jyly uıymǵa elimiz alǵash engennen bastap 1999 jylǵa deıin jalǵastyrǵan. QR SІM Erekshe tapsyrmalar jónindegi elshisi bolǵan.
Serik Smaıluly Qırabaev 1927 jyly týǵan. Ol - ǵalym-ádebıetshi, fılologııa ǵylymdarynyń doktory, professor, UǴA akademıgi, Qazaqstan men Qyrǵyzstanǵa eńbegi sińgen qyzmetker, Memsyılyqtyń laýreaty, 600-ge jýyq qazaq ádebıeti ǵylymı jumystarynyń avtory.
Eskendir Ótegenuly Hasanǵalıev 1940 jyly týǵan. QR halyq artısi, sazger, 200-den astam shyǵarmanyń avtory, onyń ishinde áıgili «Atameken» áni de bar.