Dıplom jumysyn satatyndar jáne aqshaǵa jazyp beretinder jazalanýy múmkin
TALDYQORǴAN. QazAqparat - Internet jelisinde ashyq túrde dıplom, magıstrlik ǵylymı jumystardy jazyp, satatyndar jazalanýy múmkin. Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysyndaǵy departamenti osyndaı bastama kóterdi, dep habarlaıdy QazAqparat tilshisi.
Osy qyzmettiń jarnamasyna zańdy túrde tyıym salý bastamasy Almaty oblysynda kóterildi. Usynys bildirýshiler birinshi kezekte dıplom, dıssertatsııalyq jumystardyń arnaıy bazasyn engizý qajet dep otyr. Sebebi, osy baza arqyly ǵana ár dıplomnyń qansha ret qoldanylǵany, qalaı, qaıdan shyqqanyn anyqtaý múmkin bolady deıdi olar. Sonymen qatar, dıplom jumystaryn antıplagıatqa tekserý jónindegi quziretti joǵary oqý oryndaryna emes, ýákiletti organdarǵa berý qajet.
«Ondaı saıttarǵa Qazaqstanda tyıym salynbaǵan. Sol máselege memleket, Úkimet, mınıstrliktiń nazaryn aýdaryp, usynys jasap, osy boıynsha oǵan shekteý qoıatyn, jazaǵa tartatyn, aıyppul salatyn erjelerdi engizýimiz kerek», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń basshysy Serikbaı Nurǵısaev.
Agenttik ókilderiniń sózinshe, aqshaǵa dıplom jazatyndarǵa, ony satyp alýshylarǵa jaza qoldaný arqyly ǵana bilimge qoıylatyn talap kúsheıedi.
Qazir dıplomdy da, ǵylymı jumysty da esh qınalmastan ınternet arqyly jazdyryp alýǵa bolady. Ol úshin ǵalamtordy ashyp, dıplom jumysy degen sózdi terseńiz boldy, túrli usynystar qaptap shyǵa keledi. Máselen, kolledjderge jazylatyn dıplomnyń quny - 50 myń teńgeden, bakalavrdiki - 65 myńnan, al doktorlyq dıssertatsııanyń baǵasy 500 myń teńgeden bastalady.
