«Dıplom taratýmen» aınalysyp kelgen 15 ýnıversıtet jabyldy – Qýanysh Erǵalıev

ASTANA. QazAqparat – Qazirgi tańda «dıplom taratýmen» aınalysatyn 5 ýnıversıtetti jabý boıynsha sot protsesi júrip jatyr. Buǵan deıin 15 joǵary oqý orny jabyldy.

Bul týraly Ortalyq kommýnıkatsııalar qyzmetindegi brıfıng barysynda jýrnalısterdiń suraǵyna jaýap bergen Ǵylym jáne joǵary bilim vıtse-mınıstri Qýanysh Erǵalıev aıtty, dep habarlaıdy QazAqparat tilshisi.

«Sońǵy 2-3 jyldyń aıasynda «dıplom taratýmen» aınalysatyn ýnıversıtettermen jumys atqarylyp jatyr. Onyń ishinde qazirgi tańda 15 ýnıversıtet jabyldy. Al taǵy 5 ýnıversıtetti jabý boıynsha sot protsesi júrip jatyr. Osy ýnıversıtetterde naqty qansha stýdent oqyp jatqanyn dál qazir aıta almaımyn. Degenmen ár oqý ornynda ortasha 2-3 myń stýdent oqıdy desek, onda 10 myń stýdenttiń aınalasynda bolady», - dep jaýap berdi Qýanysh Erǵalıev.

Onyń aıtýynsha, bıyl 28 ýnıversıtetke memlekettik baqylaý júrgizilgen. Onyń teń jartysy josparly tekseris bolsa, qalǵan jartysy profılaktıkalyq maqsatta ótkizilgen.