Dıplom basyp beretin JOO-larǵa qatysty jumystar jalǵasady - mınıstr

NUR-SULTAN. QazAqparat – Qazaqstanda óz mindetine salǵyrt qaraǵan joǵary oryndaryna qatysty 15 sot isi qaralyp jatyr. Bul týraly QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

Búgin elordada ótip jatqan «Adamı kapıtal - Jańa qazaqstan damýynyń negizgi resýrsy» forýmynda tilshiler mınıstrden «dıplom taratýmen» aınalysatyn joǵary oqý oryndaryna qatysty qandaı sharalar qabyldanyp jatqany jaıynda surady.

«Buǵan deıin Bilim jáne ǵylym mınıstrligi tek dıplom taratýmen aınalysyp júrgen JOO-lardy jabý boıynsha aýqymdy jumysty atqardy. Bul baǵyttaǵy jumystar jalǵasady. Qazirgi kezde 15-ke jýyq sot isi qaralyp jatyr. Degenmen bul ýnıversıtetter túgeldeı jabylady degendi bildirmeıdi», - dedi S. Nurbek.

Mınıstrdiń aıtýynsha, joǵary bilim salasyndaǵy sapa máselesine erekshe mán berilip otyr.

«Mınıstr retinde birinshi kezekte bilim sapasyna jaýap beremin. Jalpy, barsha bilim berý júıesi bul ustanymǵa erekshe nazar aýdarǵany jón. Eger joǵary oqý orny mınıstrlik aıqyndaǵan reglamentke saı kelmese, biz bul máseleni qatań baqylaýǵa alamyz», - dedi vedomstvo basshysy.

Eske sala keteıik, QR Prezıdenti Qasym-Jomart Toqaev dıplom basyp bere beretin joǵary oqý oryndaryn jabý qajet ekenin aıtqan edi.